Tuir komunikadu ne'ebé Online INDEPENDENTE asesu katak, kandidatu hirak ne’ebé tuir teste ne’e admitidu ona iha selesaun dokumentus, ne’ebé antes ne’e sira ne’e submete ona sira nia dokumentu ba iha ANATL, hamutuk atus tolu, tolu nulu resin.

Nune’e, iha prosesu selesaun dokumentus refere, iha kandidatu nain 129 maka admitidu hodi hakat ba iha faze teste eskrita nian.

Prezidente ANATL, Romualdo António Soares da Silva, hatete liu husi teste ne’e, sei persija de’it aplikante hamutuk na’in 30 maka sei ba eskola iha indonézia iha área espesifiku sira.

“Ohin ami halo testing ba bolseiru sira atu ba eskola iha indonézia, servisu humutuk ho politekniku Bandung, Palembang, no Surabaya. Testing ne’e la’ós foin primeira véz maibé hala’o dala haat ona, atu dehan katak testing ida ne’e ami halo preparasaun kordenasaun hamutuk ho FDCH no mós politekniku sira husi indonézia involve mós husi Ministeriu transporte no komunikasaun, ba aplikante ne’ebé mak applay hamutuk atus tolu tolu nulu resin haat pasa ba iha selesaun dokumentus hamutuk 129 pesoas, agóra ita hahú testing sira. Vaga ne’ebé maka persija hamutuk tolu nulu,”dehan Prezidente ANATL, Romualdo António Soares da Silva, liu husi Komunikadu ne’ebé Online ne’e sita iha Pajina MTC, segunda ne’e (08/09/25).

Xefe Divizaun Akademia no Kadete Politékniku Aviasaun Surabaya Ministériu Transporte Indonézia nian, Parjan agradese ba Governu Timor-Leste liu husi Ministériu Transporte no Komunikasaun, ANATL no FDCH hodi halo teste ba bolseiru sira ne’e.

“Lori Governu Indonézia nia naran, ami hakarak hato’o ami nia agradesimentu ba ANATL, FDCH, no Ministériu Transporte no Komunikasaun Timor-Leste ne’ebé fó fiar ba politékniku aviasaun Indonézia nian hodi eduka potensiál kadetes Timor-Leste nian. Ami hein katak kolaborasaun ida-ne'e sei kontinua fó impaktu pozitivu ba relasaun sira entre nasaun rua, hodi permite ami atu kontribui ba hadi'a kualidade rekursu umanu sira, liuliu iha setór transporte no aviasaun nian tenik Parjan.

Entretantu, bolsa estudu ne’e estabelese tanba hetan kooperasaun entre Ministeriu Transporte no Komunikasaun ho Fundu Dezenvolvimentu Kapital Umanu (FDCH-Sigla Portugués) no mós Politékniku Aviasaun Surabaya husi Ministériu Transporte Indonézia nian, hodi halo teste ba kandidatu sira.

Áréa espesifiku sira ne’ebé kandidatu sira sei prinse maka, ATC (Air Traffic Controller), ANE (Air Navigation Engineering), AEE (Airport Electricity Engineering), ACE (Airport Civil Engineering), ARF (Aircraft Rescue Fighting) AME (Airport Mechanical Engineering) no AO (Airport Operation).

Enkuantu, kandidatu bolseiru tolu nulu (30) ne’ebé selesionadu sei ba eskola iha indonézia, foti diploma 3 ho durasaun tinan tolu hafoin ne’e sei servisu iha ANATL.