Relativamente ho Lei promosaun ba exportasaun ne’e, Ministru Komersiu Indústria, Nino Pereira hatete, Lei ida ne’e laos deit dokumentu juridíku ida, maibe sai nudar xave estratéjika atu loke dalan ba futuru ekonomiku Timor-Leste ne’ebé sustentável no independente,

“Ita hotu hatene katak atu garante sustentabilidade no dezenvolvimentu ekonomiku Timor-Leste nian iha tempu naruk ita labele depende deit ba fundu mina-rai, ita presija diversifika ita nia ekonomia no fortalese setor privadu, atu nune sira bele produz sasan no servisu ho kualidade no partisipa ativamente iha merkadu rejianál no global,” Tenik Ministru Nino liu husi Komunikadu ne’ebé Media INDEPENDENTE asesu husi Media Parlamentu Nasional, Tersa (10/03).

Ministru Nino afirma, Lei ne’e importante ho razaun primeiru hare ba integrasaun rejionál no global; segundu - insentivu ba empresa sira; terseiru - promosaun ba bens no servisu made in Timor-Leste; no ikus, garantia jurídica.

Governu prepara proposta lei ida ne’e ho vizaun ida klaru kria oportunidade servisu ba ita nia juventude sira, bainhira exportasaun aumenta atividade industrial mos sei dezenvolve no oportunidade traballu foun sei mosu ba ita nia povo.

Entretantu, sesaun plenária ne'e, prezide husi Prezidente Parlamentu Nasionál, Maria Fernanda Lay, akompañia husi membru Meza sira, ho prezensa husi Ministru Komersiu no Indústria, Filipus Nino Pereira ho nia komitiva no Vice- Ministru Asuntu Parlamentar, Adérito Hugo da Costa.