Ho aprovasaun ne’e, Xefe Estadu sei deklara estensaun Estadu Emerjénsia fulan ida tan hahú husi loron 3 fulan-abril to’o loron 2 fulan-maiu tinan 2021, atu fó kbiit ba Governu atu halo prevensaun no mitigasaun ba propagasaun surtu vírus SARS-COV2, ne’ebé daudaun ne’e tama ona iha tranzmisaun lokál.
Molok ne’e Prezidente Repúblika, Francisco Guterres Lú Olo, loron segunda (29/3), hafoin rona hanoin husi membru Konsellu Estadu no Konsellu Superior Defeza no Seguransa, husu autorizasaun Parlamentu Nasionál atu deklara estensaun estadu emerjénsia tuir Governu nia pedidu atu estende estadu emerjénsia ba períodu loron tolu-nulu (30), hahú husi tuku 00.00 iha 3 abril 2021 no remata iha tuku 23.59 iha loron 2 maiu 2021.
Estadu emerjénsia ba dasanuluk-resin-ida sei remata iha 2 abril 2021.
Entretantu, tuir dadus husi Sala Situasaun Sentru Integradu Jestaun Krize (SIJK), Timor-Leste rezista ona kazu pozitivu Covid-19 kumulativu hamutuk 563, kazu ativu hela 382, rekuperadu 181, enkuantu seidauk rezista kazu óbitu. Entretantu iha nivel mundial nian, tuir dadus hosi https://www.worldometers.info/coronavirus), ba loron 31 fulan-marsu tinan 2021, kazu pozitivu atinje ona millaun 128,788.958, mate millaun 2,815,. no ne’ebé rekuperadu millaun 103,916.332.
Jornalista: Saturnina da Costa
Editor: Jose Sarito amaral
