Tuir komunikadu ne’ebé online INDEPENDENTE asesu katak iha serimónia inaugurasaun ne'e, entrega mós xave edifísiu ne’e bá Sekretáriu Jerál OJETIL, José Manuel Fernandes “Nakfilak”.

Serimónia inaugurasaun no entrega xave ne’e marka pasu importante ida hodi rekuiñese no valoriza kontribuisaun juventude Timoroan sira iha luta libertasaun nasionál no iha prosesu dezenvolvimentu nasaun nian.

Iha eventu ne’e, Primeiru-Ministru Xanana Gusmão hatudu importánsia organizasaun juventude sira nian nu’udár parte importante hosi istória rezisténsia no konstrusaun Estadu Timor-Leste.

Partisipa iha seremónia ne’e membru Governu Konstitusionál sira, inklui Ministru Justisa, Sérgio de Jesus Fernandes da Costa Hornai no Ministru Defeza, Pedro Klamar Fuik.

Marka prezensa mós eis Primeiru-Ministru, Rui Maria de Araújo, membru sira hosi Parlamentu Nasionál, antigu kombatente sira, inklui Alin Laek,  membru no estrutura OJETIL sira hamutuk ho reprezentante organizasaun klandestina seluk ne’ebé durante tempu okupasaun hala’o luta iha rai-laran.

Inaugurasaun sede foun OJETIL ne’e espera bele sai fatin ida atu hametin papél juventude sira iha edukasaun, lideransa no partisipasaun ativa bá dezenvolvimentu nasionál.