PM Konvoka Reuniaun ho Xefe Suku Sira Husi Dili, Rekolla Informasaun Ba Programa Vasina Featured

By Saturnina da Costa Juñu 09, 2021 319
PM Konvoka Reiunaun ho Xefe Suku Sira Husi Dili, Rekolla Informasaun Ba Programa Vasina, loron tersa lokraik (08/06). Foto: Gab.PM. PM Konvoka Reiunaun ho Xefe Suku Sira Husi Dili, Rekolla Informasaun Ba Programa Vasina, loron tersa lokraik (08/06). Foto: Gab.PM.

DILI:Primeiru-Ministru Taur Matan Ruak, konvoka reuniaun ida ho Xefe Suku sira husi Munisípiu Dili, ho Objetivu atu haree hodi hakotu propagasaun surtu Covid-19 iha Timor-Leste.

Nune’e, dalan ida atu hakotu virus Covid-19 mak liu husi vasina.

“Tanba ne’e, Xefe Governu hakarak rekolla informasaun husi Xefe Suku sira kona-ba programa vasina ne’ebé daudaun ne’e la’o hela iha terenu, atu bele buka mekanizmu ida di’ak liutan, nune’e bele involve sidadaun barak iha vasina,”dehan PM iha Ministeriu Finansas,(08/06).

Iha reuniaun ne’e, Xefe Governu fó oportunidade ba Xefe Suku sira hodi hato’o informasaun ne’ebé hasoru iha suku laran durante implementasaun faze dahuluk ba vasinasaun.

Nune’e, Xefe Suku sira hato’o preokupasaun no mós sujestaun hanesan, husu Governu atu fó vasina ba sidadaun sira obrigatóriu, halo jestaun di’ak ba tempu no fatin, hasa’e númeru pesoál ne’ebé fó atendementu ba vasina.

Tanba, hare ba komunidade sira daudaun ne’e entuziazmu tebes hakarak simu vasina, maibé númeru pesoál, vasina no livru kinur  mak la sufisiente.

Entretantu Xefe Governu rekoñese sakrifísiu Xefe Suku sira-nian iha baze ne’ebé sensibiliza no mobiliza komunidade ba simu vasina, nune’e aproveita reuniaun ne’e, Xefe Governu agradese tebes ba esforsu refere.

“Governu rekoñese nai Xefe Suku sira nia sakrifísiu no husu fó nafatin kontribuisaun, para mais ita-nia sidadaun vasina barak liután, mais loke ba normalidade foun, para atividade ekonomia no sosiál bele lao filafali”, dehan Xefe Governu.

Kona-ba opiniaun sira Xefe Suku nian, Xefe Governu hateten, sei diskute kle’an liután ho Ministériu Saúde, no ekipa Sala Situasaun atu bele hetan mekanizmu di’ak iha programa vasinasaun ne’e, nune’e bele atinji meta ne’ebé Governu define ona.

Ikus liu, Xefe Governu esplika, bainhira númeru vasina atinji ona meta, Governu iha posibilidade normaliza fali vida ekonomia no sosiál, hamamar regras sira ne’ebé durante ne’e impoin, atu komunidade sira bele sírkula livre halo atividade sósiu-ekonómiku.

 

Asistente Editor: Saturnina da Costa

Rate this item
(0 votes)
Last modified on Kuarta, 09 Juñu 2021 12:28

Independente Digital TV