Tuir informasaun ne’ebé Online INDEPENDENTE asesu iha media vatikanu katak Santo Papa Francico hakotu iss iha loron 21 fulan-Abril, tinan ne’e, iha oras tuku 07:35 dader, iha Roma, Italia.

Kardinal Kevin Farrell, Camerlengo husi Câmara Apostólika, anunsia husi Casa Santa Marta ho liafuan sira ne’e.

"Irmãus no irmãs karidus, ho tristeza boot ha’u tenke anunsia mate husi ita-nia Aman Santu Francisco. Iha dader ne’e oras 7:35, Bispu Roma Francisco, fila ba uma Aman Nian,”dehan Kardinal Kevin, ne’ebé Online sita iha Vatikan news, segunda ne’e (21/04/25).

“Nia moris tomak dedika ba servisu ba Maromak no ba nia Igreja. Nia hanorin ita atu moris ho valor sira husi Evangellu ho lealdade, korajen, no amor universal, liuliu ba ema kiik no marginalizadu,”dehan Kardinal.

“Ho gratidaun boot ba nia ezemplu hanesan disipulu verdadiro ba Jesus, ita entrega alma Papa Francisco ba amor misericordioso husi Maromak Ida no Trinu”.

Entretantu, Santo Papa Francisco hakotu is ho idade tinan 88.

Enkuantu, Papa Francisco ho naran Jorge Mario Bergoglio, moris iha Bairu Suku Flores, Buenes Aires, Argentina, iha loron 17 fulan-Dezembru tinan 1936.

Moris husi Aman naran Mario José Bergoglio no inan naran Regina Maria Sívorí.

Papa Francisco eleitu nu’udar pontifíse supremu iha loron 13 fulan-Marsu tinan 2013, nu’udar Papa ba dala-266.

Relembra fali katak, Papa Francisco vizita ona Timor-Leste iha loron 9 to’o 11 fulan-Setembru tinan 2024.