Atual Vise Primeiru Ministru, Ministru Koordenador Asuntu Sosiál no Ministru Dezenvolvimentu Rural no Abitasaun Komunitáriu ne’e hatete, nu’udar PM interinu nia orienta ona Ministra Elia atu tau-matan ba kazu ne’e.

"Ha'u orienta ona ba Ministra par atu forma ekipa par investiga, tanba sasán sira ne'e idaidak halo interpretasaun, ne'ebé agora akontesimentu hanesan ne'e ita investiga i ita hein de'it rezultadu investigasaun, i sira komesa halo ona, foin ita hatene ninia kauza loloos," dehan Assanami, iha areador ICS Komoro, Kuarta (16/04).

Iha fatin hanesan, Reitor Institutu Siénsia Saúde (ICS), Leão Borges relasiona ho deskonfiansa katak Januario lakon vida tanba failansu husi estudante estajiariu husi ICS, hatete katak, ida ne’e responsabilidade HNGV nian, tanba sira entrega ona estudante iha sira-nia liman durante fulan tolu atu hala'o estajiu iha ne'eba.

Parte ICS laiha komentáriu tanba HNGV rasik iha nia mekanizmu no iha nia ekipa hodi halo investigasaun ka foti dadus relasiona ho kazu ne’e.

Molok ne’e, Diretór Servisu Apoiu Diagnostiku no Terapeutiku, Hospital Nasionál Guido Valadares (HNGV), Vidal de Jesus hatete, nia parte simu ona informasaun husi mediku sira ne’ebé servisu iha 13 Abril kalan kona-ba kronolojia loloos ba akontesimentu.

Ho nune’e, HNGV sei forma ekipa ida hodi halo clinical audit ba akontesimentu ne’e hodi bele hatene informasaun ne’ebé loloos.

Ba kauza husi mate, Diretór ne’e dehan, iha siensia medika buat hotu-hotu tenke bazeia ba evidensia. Maibé tuir persepsaun ne’ebé iha katak raan ne’ebé sai mak sai kauza pasiente ne’e lakon vida.

“Iha siensia medika ne’e buat hotu-hotu tenke base on evidence, balun ne’ebé ita espeta, balun ne’ebé ita la espeta. Tuir persepsaun katak kauza husi raan sai ne’e mak halo pasiente ne’e iis kotu. Maibé depois de ami haree no analiza, desde ponto devista klinika katak montante husi raan ne’e rasik, kuandu ita kalkula ba indisius ba shock ne’e, hypovolemic shock ne’e, seidauk tama.”

“Mais tanba ita-nia avo ne’e, ita-nia pasiente ne’e, nia ho purvolta 81 anos, ho past medical history ho diabetes type two ne’e posivel cause of death ne’e nia bele pulmonary embolism client hard atake ou silent heart attack ne’e bele akontese, i ho faktores risku diabetes ho faktores idade ne’e,” Diretór Vidal esplika liu husi konferensia imprensa iha HNGV, Segunda (14/04).

Pasiente ne’e, nia esplika, halo tratamentu durante semana ida iha sala Sirujia Emerjensia, no tuir planu atu halo operasaun iha 14 Abril ne’e.

Iha 13 Abril, estudante estajiadu mak ba hasai kanula iha pasiente nia liman ne’ebé bubu, hafoin nia tau kabas no plester.

Nia esplika, atendimentu balun ne’ebé simples hanesan monitoring vital signs hanesan temperatura, tensaun ka hasai kanula ne’e estajiariu sira bele ba hasai, tanba iha pratika klinika atividade hirak ne’e ninia risku menus tebes.

“Mais infelismente momentu ne’e ho konsidensia, ho pasiente langsung shock entaun persepsaun ne’e ladun di’ak ba estudante sira mós, tanba kuandu ita hasai soru, kanula ne’e, taka de’it, kal taka ladun metin, plester ne’e, ne’e mak raan sai.”

“Loos duni, ne’e ami rekoñese katak failansu husi ami tanba ami husi senior sira la monitoriza ho di’ak. Ida ne’e ba oin ami sei hadia atu bele evita akontesimentu inesesariu sira hanesan ne’e” dehan nia.

Diretór ne’e hatutan, sei iha enkontru Intensivu ho Xefe Departamentu, Xefe Unidade no ekipa ne’ebé hala’o servisu ho edukadór sira atu haree di'ak estajiadu hodi evita akontesimentu inesesariu iha futuru.