“Ita nia Amo Domingos Maubere hakotu is iha ICU, HNGV, iha tuku 07:00 dader, tanba ita hatene katak ita nia Amo sofre moras komplikadu no Nia mós iha faze kritíku nia laran,”dehan Diretór Servisu Apoiu Diagnostiku Terapeotíku iha HNGV, Doutor Vidal de Jesus Lopes, liu husi via WhatsAap, sesta ne’e (16/05/25).

Entretantu, tuir observasaun Online INDEPENDENTE nian iha terenu haree katak, hafoin rona novidades triste kona ba Amo Domingos nia falesimentu, Dom Virgilío Kardeal do Carmo da Silva to’o kedas iha HNGV hamutuk ho sarani no familia sira hasa’e orasaun ba Padre nia falesimentu, atu nune’e deskansa hakmatek iha Na’in nia kadunan santu.

Nune’e mós Primeiru Ministru, Kay Rala Xanan Gusmão hamutuk ho membru Governu to’o mós iha Sala ICU, hodi halo orasaun ba Padre Domingos.

Enkuantu, tuir ajenda, iha tuku 09:00 dader ne’e iha ona misa ba Padre Domigos nia maktoban, iha Kapela Nossa Señora de Lourdes HNGV.

Nune’e, hafoin misa remata, iha tuku 13:00, sei translada Maktoban Padre Domingos ba Letefoho Ermera.