Administradór Munisipiu Atauro Domingos Soares hatete, programa merenda eskolar iha Munisipiu Atauro la'o ona hahú kedas iha fulan Janeiro tinan ne’e, no realiza ona iha eskola Eskola Baziku Sentral no Pre-eskolar sira.
"Iha Janeiru ita estabele ona kontratu ho ekipa programa merenda eskolar lima ne'ebé lokaliza iha suku lima, sira halo fornesementu ba pre-eskolar 11 no ensinu báziku 11,”dehan nia iha Salaun Parokial Vila-Maumeta, kuarta (15/03).
Administradór esplika, estudante ne'ebé asesu ba merenda eskolar mai husi eskola primaria ho eskola báziku total hamutuk rihun rua.
Iha sorin seluk, Diretór Nasional Edukasaun Munisipiu Atauro, Januario de Aroujo hatete, ba programa merenda eskolar iha munisipiu Atauro ba faze dahuluk nian, implementa deit ba fulan tolu, hahú husi Janeiru to'o Marsu 2023, tanba tuir kalendariu ne’ebé mai husi Ministeriu Edukasaun Juventude no Desportu seidauk klaru.
"Kalendáriu ba programa merenda eskolar ba faze dahuluk hamutuk loron atus ida sia nulu resin ida (191) de'it, tanba Kalendáriu seidauk los," dehan nia.
Tanba ne'e, orasamentu ne'ebé aloka ba merenda eskolar ba faze dahuluk ho montante $227. 423.70.
Husi orsamentu ne'e ba pre-eskolar 11 hamutuk $43,960,56 no EBC 11 hamutuk $183, 463,14.
"Tinan uluk kada loron estudante ida hetan de'it osan $0,25 centavos, maibé tinan 2023 Governu hasa'e ona ba $0,42 centavos," nia hakotu.
