Opozisaun Apoiu Sosa Asaun ConocoPhillips ho Kondisaun Featured

By Jacinto Xavier Outubru 26, 2018 2242

DILI: Partidu opozisaun iha Parlamentu Nasionál sei apoiu Governu atu foti Fundu Petrolíferu (FP) hodi sosa asaun ConocoPhillips, maibé kondisaun ida maka tenke aprezenta relatóriu rezultadu estudu viabilidade.

Deputadu Bankada FRETILIN, Marito Mota hatete, prosesu negosiasaun ba sosa asaun ConocoPhillips ne’ebé Xanana Gusmão halo ne’e interese nasionál tanba ne’e hanesan Timoroan apresia.

“Maibé Parlamentu Nasionál ami mós hatene nia-benefísiu ba futuru ne’e oinsá”, dehan nia, iha Uma Fukun PN, horisehik.

Nia hatete, antes atu ba sosa asaun ne’e dala ruma Governu halo ona estudu ida atu haree ba valór ekonómiku ba futuru nian, entaun presiza aprezenta mai PN atu ba baze povu husu karik bele esplika.

Opozisaun presiza tebes rezultadu estudu ne’e, kuandu sira aprezenta teknikamente fó benefísiu duni ba povu konserteza sei apoiu foti osan mina-rai, aprezentasaun maka hamosu duvida entaun presiza iha diskusaun.

Iha fatin hanesan, tuir Deputadu Bankada Partidu Demokrátiku (PD), Mariano ‘Assanami’ Sabino hatete, sira iha prinsípiu defende atu dada kadoras mai Timor, tanba ne’e hanesan polítika interese nasionál.

Fronteira Marítima, petrolíferu no riku-soin sira seluk ne’e konsidera hanesan polítika soberania no polítika ekonómika ne’ebé hanoin prinsipál tebes atu bele benefísiu ba povu no nasaun.

Iha situasaun saida de’it militante no simpatizante PD 100% apoiu governu atu dada kadoras mai Timor.  

Rate this item
(0 votes)

Independente Digital TV