Diretor Jeral Teras Propriedade, Lucas António da Costa informa, notifikasaun ho prazu loron 10 ba kompaña atu hamamuk rai iha area Markoni remata ona, tanba ne’e Ministeriu Justisa deside hodi ba sobu lutu ne’ebé kompaña harii.
Ho nune’e, Lucas dehan, iha 20 Outubru 2022, tuku 08.00 dader, Diresaun Jerál Terras Propriedade hamutuk ho Gabinete Inspesaun Auditorial (GIA) mobiliza Polisia Nasional Timor-Leste hodi garante seguransa atu sobu lutu ne’ebé kompaña Xina harii haleu rai iha area klinika 333 nia oin.
“Aban (ohin) ita hamutuk ho autoridade seguransa, PNTL, sobu lutu Markoni iha area Klinika 333 nia oin, tanba prazu ba notifikasaun loron 10 remata, rai ne’e estadu nian,” dehan Lucas ba jornalista Jornal INDEPENDENTE via telefone, Kuarta (19/10).
Tuir lei, nia hatutan, bainhiara governu hatama ona notifikasaun ho prazu loron 10 atu kompaña ne'ebé hala'o atividade husik mamuk fatin refere maibé sira lakohi, governu uza kompetensia tuir lei hodi sobu.
“Ita sobu lutu ne’e atu hatudu ba publiku no ema hotu katak estadu ne’e ita iha autoridade, iha lei, labele grupu no ema ida manda fali iha lei nia leten, ita hotu tenke iha lei nia okos, tanba ne’e prazu notifikasaun remata ita hahú sobu,” katak nia.
Molok ne’e, Minsitru Justisa Tiago Amaral Sarmento hatete, Ministériu Justisa hatama ona karta notifikasaun hodi anula despaisu anterior no despaisu ida ne’e boot liu tanba iha baze legal ne’ebé forte.
“Tanba ne’e mak prosesu rai Markoni hein de’it loron hira par MJ ho GIA hamutuk ho seguransa PNTL tuun ba sobu,” dehan nia.
Tuir loloos, nia dehan, MJ iha kompetensia halo enbargo iha rai Markoni, maibé tanba MJ hakarak fó aprende lei hamutuk hodi aplika tuir, tan ne’e MJ fó prazu loron 10 ba ema ne’ebé rekere nu’udar na’in ba rai no kompaña atu sobu rasik.
“Sa tan propriedade ida ne’ebá dominiu rodaviaru nian ne’ebé sukat husi tasi sa’e mai metru 50 ne’e laiha ema ida mak iha direitu tanba ne’e estadu nian hotu, tanba ne’e ita konsidera dominiu públiku estadu,” nia hatutan.
Iha tempu seluk, advogadu privadu husi na’in ba rai, Cancio Freitas hatete, nia parte seidauk simu informasaun husi ninia kliente kona-ba notifikasaun foun husi MJ atu sobu lutu.
“Ami la simu notifikasaun. Haruka Ministru hatama prosesu ba Tribunal de’it. Ministru atu poder administrativu boot to’o iha ne’ebé mós atu halo prosesu andamentu ne’e iha, ha’u mak iha poder depois haruka ema atu sai de’it sem desizaun judisial, ne’e la loos,” dehan advogadu husi Fatima Alkatiri ne’e, ba jornalista jornal INDEPENDENTE vita telefone, Sesta (30/09).
Cancio afirma, sira-nia parte seidauk simu notifikasaun husi MJ. Maske simu ona mós sira sei la sobu lutu ne’ebé harii ona.
“Ami seidauk simu notifikasaun, mezmu simu mós ami sei la sobu. Se sira mai sobu kan ne'e krime to. Ami hein de'it sira atu halo saida, ami-nia posizaun klaru,” dehan nia.
Cancio hatete tan, nia parte la tauk tanba sira iha dokumentus komprovativu.
“Ami hein de’it sira atu halo saida, kecuali ami laiha dokumentu legal ba rai mak ami tauk, maibé rai ne’e ami nian, ami iha dokumentu komprovativu, se sira mak mai sobu ida ne’e krime danu agravadu, abuzu poder, ida ne’e tama hotu, ne’ebé ami hein de’it,” dehan nia.
