MTK: Motorista Transporte Públiku Tenke Vasina Kompletu

By Julia/Gloria Setembru 10, 2021 738
Sidadaun ida simu hela vasina. Foto:INDEPENDENTE. Sidadaun ida simu hela vasina. Foto:INDEPENDENTE.

DILI: Hafoin Governu deside hakotu Konfinamentu Obrigatoriu iha kapital Dili, transporte públiku sira bele hahú ona hala’o operasaun, maibé ba motorista sira iha obrigasaun atu tenke simu ona vasinasaun dala rua.

Diretór Jeral Ministériu Transporte no Komunikasaun, Gaspar de Araújo hatete, hahú husi 10 Setembru ba oin, MTK no PNTL reativa sirkulasaun no atividade transporte publiku iha Dili no husi Dili ba munisipiu sira seluk.

Maske nune’e, nia dehan, motorista sira tenke hetan ona vasina kontra Covid-19 dala rua.

“Husu motorista, ajudante no pasajeiru sira obrigatoriu tenke hetan ona vasina dala rua no hatudu duni kartaun kinur bainhira hala’o atividade lorloron tenke lori tutuir ho kartaun vasina nian, kontinua uza maskara wainhira hala’o atividade, mantein nafatin distansiamentu fiziku, fase liman beibeik ka dezinfekta beibeik liman ho hand sanitizer, motorista sira tenke lori sira-nia karta kondusaun, transporte sira tenke iha lisensa legal ne'ebe sei moris,” dehan nia.

Sirkulasaun transporte públiku hahú la’o, tanba ne’e PNTL ho DNTT sei hala’o auto stop iha ponte entrada hodi garante katak motorist, ajudante no pasajeiru sira kumpre kondisaun sira ne'ebe hato'o ona.

“Ba sira ne’ebé karta kondusaun mate hafoun tiha mak foin bele la’o reativasaun ne'e sei sujeitu nafatin ba evolusaun propagasaun virus covid -19 iha ita-nia rain, karik iha tempu oin mai governu halo fali desizaun foun mak ita sei informa fali ba publiku,” nia hatete.

Iha fatin hanesan, Komandante Seksaun Tranzitu Nasional, Inacencio da Costa Freitas akresenta, PNTL sei koordena ho Sentru Integradu ba Jestaun Krize (SIJK) kona-ba sasaun saida mak fó ba motorista sira ne’ebé mak la kumpre regras.

Entretantu, Xefe Departamentu Veikulu Diresaun Nasional Transporte Terestre (DNTT), Nelson Sequeira Martins informa, hahú ohin DNTT hahú reativa atividade DNTT nian tan ne’e bele hakbesik an hodi renova dokumentus.

“Agora daudauk ita loke depois ita sei fó tempu ba motorista sira hodi renova dokumentus, aban (ohin) bele mai halo dokumentus, DNTT sei halo atendimentu normal ba sira,” nia dehan

 

MS husu Sidadaun Simu Vasina

Diretora Jeral Prestasaun Saude, Odete da Silva Viegas hatete, konfinamentu obrigatoriu remata ona tanba ne’e husu ba komunidade tomak atu bele hakbesik an ba fasilidade saude sira hodi simu vasinasaun.

“Tanba ita hatene ho vasina, pelumenus ita bele minimiza risku ba ita-nia aan, tanba kazu sira ne’ebé mate barak ne’e kuaze maioria ema seidauk simu vasina,” dehan nia iha nia knaar fatin, Palasiu das Sinzas, Kaikoli, Kinta (09/09).

Nia dehan, iha ema ne’ebe mate ho simu vasina kompletu, maibé ema hirak ne’e la’os mate tanba sira-nia moras ne’e de’it, maibé mós mai ho moaras kroniku sira seluk, hanesan diabetes, tensaun nune’e hatodan liu sitausan.

Maske nune’e, nia husu atu populasaun hotu tenke haree benefisiu husi vasina ne’e, tanba benefisiu husi vasina ne’e boot liu kompara ho nia risku.

Rate this item
(0 votes)
Last modified on Domingu, 12 Setembru 2021 21:01

Independente Digital TV