Segunda, 18 Outubru 2021 | Login
Teste PCR hatudu rejultadu positivu. Foto:INDEPENDENTE. Teste PCR hatudu rejultadu positivu. Foto:INDEPENDENTE.

09 Setembru: Positivu Foun iha 165, Mate Rua

DILI: Sala Situasaun Sentru Integradu ba Jestaun Krize (SIJK) ohin (09/09) relata, ekipa konjunta rejista tan kazu positivu foun Covid-19 haamutuk na’in 165 no mate na’in rua (2).

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.

Husi total kazu detetadu 165, iha Dili deteta kazu 81, Bobonaro kazu 40, Baukau kazu 20, Ainaro kazu 5, RAEOA kazu 5, Manatuto kazu 4, Manufahi kazu 4, Aileu kazu 2, Kovalima kazu 2 no Vikeke kazu 1.

“Husi kazu detetadu ne’e, na’in 73 ka 44,2% hatudu sintomas, na’in 27 ka 16% simu ona vasina kompletu no na’in 23 ka 14% simu ona vasina doze dahuluk,”dehan nia iha komunikadu ne’ebé Online INDEPENDENTE asesu kinta ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha 9 Setembru ema na’in 271 mak rekupera.

Ba kazu mate, Rui informa, na’in ida simu ona vasina AstraZeneca doze kompletu no na’in ida seluk seidauk simu vasina.

Kazu dahuluk, mane ho idade tinan 57, simu ona vasina kompletu, diagnostikadu Sindroma Insufisiensia Respiratoria Aguda (SIRA) tanba Covid019 iha Hospital Nasionál Guido Valadares iha 1 Setembru. Pasiente ne’ebé sofre mós moras diabete ne’e iis kotu iha izolamentu Lahane, horseik loraik tuku 17.56.

“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.

Kazu daruak, mane ho idade tinan 66, seidauk vasina, diagnostikadu iha Hospital Referensia Eduardo Ximenes Baukau ho SIRA tanba Covid-19 iha 3 Setembru. Pasiente ne’e sofre mós moras diabetes, ipertensaun no insufisiensia kardiaka.

Familia lori mai Dili no hela iha uma de’it, pasiente ne’e iis kotu iha 9 Setembru dader tuku 06.00.

Ba matebian ne’e, Rui hatete, familia seidauk deside atu hala’o funeral tuir protokolu ne’ebé adota iha TL.

Entretantu, husi horseik (08/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 669 kompostu husi Vijilansia sentinela na’in 22, Contact tracing na’in 28, Random screening  na’in 238, Viajen sai husi serka sanitaria Dili na’in 161, Viajen internasional na’in 2 no Follow up iha kuarentena na’in 218.

Teste PCR ne’ebé halo iha Munisipiu sira seluk, RAEOA no HNGV hamutuk na’in 402. No ohin iha Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 96 kompostu husi kazu grave na’in 13, moderadu na’in 61 no kazu leve na’in 22.

Read 401 times
Rate this item
(0 votes)