MSSI Hala’o Monitorizasaun ba Prosesu Pagamentu BdM-JF Iha Ainaro Featured

By Marsu 26, 2023 500
Vise-Ministra Solidariedade Sosiál no Inkluzaun, Signi Verdial entrega subsidiu Bolsa da Mae ba inan ida ne'ebe kous hela nia bebe, iha sentru saude Ainaro Vila, Munisipiu Ainaro, sesta (24/03),  Foto: Media Gabineti MSSI. Vise-Ministra Solidariedade Sosiál no Inkluzaun, Signi Verdial entrega subsidiu Bolsa da Mae ba inan ida ne'ebe kous hela nia bebe, iha sentru saude Ainaro Vila, Munisipiu Ainaro, sesta (24/03), Foto: Media Gabineti MSSI.

DILI: Vise-Ministra Solidariedade Sosiál no Inkluzaun, Signi Verdial hamutuk ho ninia ekipa tékniku hala’o monitorizasaun ba prosesu pagamentu subsídiu programa Bolsa da Mãe Jerasaun Foun (BdM-JF), iha Munisipiu Ainaro.

Enkuantu, pagamentu ne'e hala’o liu husi ajénsia Telkomcel/T-Pay ba benefisiárius inan isin rua no labarik sira. Pagamentu refere ba fulan Novembru no Dezembru tinan 2022 nian.

Tuir komunikadu ne’ebé Online INDEPENDENTE asesu, Bolsa da Mãe Jerasaun Foun mak programa transferénsia osan husi sistema asisténsia sosiál ne’ebé kompostu ba subsídiu $15.00 kada fulan ba inan isin-rua sira durante períodu kous no $20.00 kada fulan ba labarik tinan zero to’o tinan tolu (0-3) no sei kontinua to’o labarik tinan neen (6), ho suplementu adisionál $10.00 kada fulan bainhira labarik ho moras króniku no/ka defisiénsia.

Programa BdM-JF ida ne’e, VIII Governu Konstitusionál, liu husi Primeiru Ministru, Taur Matan Ruak lansa ona iha fulan Juñu tinan 2022 iha Munisípiu Ainaro. Antes ne’e pagamentu ba Munisípiu Ainaro nian MSSI fó konfiansa tomak ba BNCTL hodi halo pagamentu maibé iha failansus balun liga ho rekejitus Billete Identidade/BI ne’ebé maioria komunidade iha área rurais seidauk hetan BI no ikus mai MSSI entrega fali konfiansa ne’e ba iha Ajénsia Telkomcel/T-Pay hodi hala’o pagamentu.

Dadaun ne’e, Programa BdM-JF MSSI implementa ona iha Munisípiu hitu (7) mak hanesan, Munisípiu Ainaro, Bobonaro, RAEOA, Vikeke, Manatuto, Likisa no Kovalima.

“Iha failansus balun liga ho ita bo’ot sira nia pagamentu, ne’e akontese la’ós ministériu mak lakohi atu halo servisu, maibé iha rekejitus ne’ebé ita nia banku sentral impoin, liu-liu liga oinsá imi atu loke konta bankária, tanba maioria komunidade seidauk iha Billete Identidade/BI ne’ebé difikulta inan sira atu ba loke konta bankária no ikus mai labele hetan subsídiu refere, maibé imi nia osan sei lalakon, mesmu tarde maibé imi sei simu kompletu nafatin, hahu husi fulan juñu to’o outubru tinan 2022 husi ajénsia Telkomcel/T-Pay,” Vise-Ministra MSSI signi Verdial hateten, iha komunikadu ne’ebé Online ne’e sita.

Nia dehan, objetivu prinsipál husi programa ida ne’e mak atu hamenus kiak, hadia nutrisaun nomós hadia ekonomia família nian. Subsídiu ida ne’e la’os atu substitui rendimentu família nian maibé atu kompleta liu tan, esplika Vise-Ministra MSSI ba benefisiáriu sira iha fatin pagamentu.

Iha biban ne’e mós, Vise-Ministra rekomenda ba benefisiáriu sira, liu-liu inan isin rua ho labarik ne’ebé mak hetan ona sira nia direitu, husu atu sosa aihan ne’ebé nutritivu hodi fó saúde ne’ebé di’ak ba sira nia-an ho ninia labarik.

Nune’e ba futuru labarik sira bele saúdavel hodi kontinua dezenvolve Timor-Leste ho di’ak liu tan.

“MSSI la’os fahe osan, miabé ho programa ida ne’e governu hakarak kria sidadaun hotu tenke moris saudavél, tanba ne’e, programa ida ne’e mós obriga inan isin rua no labarik sira atu mai simu sira nia osan iha Sentru Saúde no Postu Saúde sira atu hala’o konsulta regular, hodi hetan akoselamentu husi pessoal saúde rasik” tenik Vise-Ministra MSSI, Signi Verdial.

Akompaña iha atividade monitorizasaun ne’e mak hanesan, Diretór Nasionál Asisténsia Sosiál-DNAS, Diretór Sentru Solidariedade Sosiál Munisípiu Ainaro, Diretór Saúde Munisípiu Ainaro no Representante Komandante PNTL Munisípiu Ainaro.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31