Ho situasaun ida ne’e, governu mós tenke hasai osan atu selu fatin hirak ne’e, no tenke mós prepara hahan ba ema sira ne’ebé tama iha kuarentena obrigatoriu.

Diretór Aprovisionamentu Ministériu Saúde (MS) Bernadino da Silva informa, MS presiza tempu atu prosesa pagamentu ba otel sira no kompaña sira ne’ebé mak fornese hahan, ne’ebé kompostu husi otel 25 no kompaña ne’ebé fornese hahan hamutuk 26.

“Ba otel no catering ne’e aloka orsamentu $2 milloes. To’o ohin loron ne’e iha ona 23 kompaña, kompostu otel 8 no catering 15, mak nia prosesu tama ona ba Ministériu Finansas,” dehan nia iha nia knar-fatin, Kaikoli, Kinta (09/07).

Nia esplika, MS seidauk halo pagamentu ba kompaña balun tanba problema ho dokumentus balun ne’ebé seidauk loos.

“Agora daudaun sira ne’ebé dokumentus loos ona halo pagamentu daudauk ona, iha kompaña 4 mak osan tama ona konta bankaria, no seluk sei prosesa, kada loron sempre iha mudansa,” dehan nia.

Bernadino informa mós katak, iha mós kompaña balun ne’ebé asina kontratu ho valor rihun $10 to’o rihun $80 bazeia ba sira-nia kapasidade atu fornese hahan, no kompaña hirak ne’e ninia kontratu la’o to’o fulan Setembru.

“Agora daudaun sei fornese nafatin hahan ba kuarentena sira,” nia hatete.

Millaun $1 ba Konstrusaun Fatin Izolamentu

Entretantu, atu bele prepara an di’ak liu tan hasoru Covid-19 ne’ebé sei sai nu’udar ameasa bae ma-nia vida, Ministériu Saúde aloka orsamentu millaun $1 ba konstrusaun fatin izolamentu iha Ospital Dr. Antonio de Carvalho Lahane no fatin rua iha Tasi-tolu.

“Agora daudaun Dili nian iha fatin 3 mak prosesu la’o tiha ona, iha Lahane aloka orsamentu $400 mill no iha Tasi-tolu $600 ital mill,” informa Diretor Aprovisionamentu Ministériu Saúde (MS) Bernadino da Silva.

Nia esplika katak iha Ospital Dr. Antonio Carvalho Lahane ne’e kompaña ETCE mak kaer obra no iha Tasi-tolu kaer husi kompaña Fraternity no Ologapa.

Bernadino hatete, orsamentu Covid-19 nian ne’ebé aloka ba MS ho total millaun $52.

Tan ne’e, nia hatutan, MS planeia atu halo konstrusaun ba fatin izolamentu iha ospital referal 5 no sentru internamentu 9.

“Ospital Rejional 5 no Sentru Internamentu hamutuk 9 iha territoriu Timor laran tomak sei estabelese konstrusaun liga ba ICU, iha Izolamentu no liga ba laboratóriu,” nia informa.