Komandante Polisia Nasionál Timor-Leste (PNTL) Munisípiu Vikeke, Superintendente António Mauluta hateten, husi vítima na’in rua ne’e, ida hetan ona hafoin mota lori liu oras balun nia laran. Maibé, ida seluk to’o horisehik (27/3), seidauk hetan.
“Ita sei kontinua buka tuir ita nia estudante ne’e to’o hetan”, dehan Mauluta, bainhira partisipa selebrasaun Aniversáriu PNTL ba dala XVII, iha Sentru Akademia Komoro, horisehik.
Oras ne’e daudaun, Polisia Eskuadra Ossu kontinua hamutuk ho família hodi buka tuir matebian ida ne'ebé lakon.
Estudante na’in rua ne’e, ida estudu hela iha Universidade Nasionál Timor Lorosa’e (UNTL) no ida seluk sei eskola sekundária iha Ossu.
Antes ne’e, iha tinan 2016 liubá, mota lalin ema na’in tolu iha munisípiu Baukau, Vikeke no Kovalima.
Ema na’in tolu ne’ebé bee lalin munisípiu Vikeke estudante feto ida, iha munisípiu Baukau katuas ida husi suku Samalari no mane ida iha Mota Karau-Ulun Suai.
