Ministru Obras Públikas, Samuel Marçal informa, projetu pilotu instalasaun fiu iha rai okos sei garante ahi la mate lakan tan iha futuru.

“Fiu ne'ebé dada husi rai okos nee foin komesa ne’e hanesan projetu pilotu ida foin hahu husi BJ Habibie ne’e ba to’o iha Bekora, ne'e hanesan faze primeiru ita hahu husi BJ Habibie ba too Bekora ne’ebá, ita hare tinan oin mak aloka ona osan balu hodi hare fali faze daruak nian, udan hanesan ne’e ahi mate beibeik, tanba ho  problema konslet iha fatin-fatin nee mak ita tau ba rai okos ne’e parte ida hodi ita haree nia estastika sidade moos no kapas liu,” Dehan Ministru Samuel, bá Jornalista INDEPENDENTE, iha resintu Palasiu Governu, Kuarta (03/12).

Ministru Samuel informa, agora haree fiu sira rungu-ranga loos, ne’ebe tau tiha fiu sira ba rai okos ne’e hodi hare estatestika sidade nia diak.

“Ita tau fiu iha rai okos hodi evita ahi labele mate no mos hamenus orsamentu halo manutensaun, fiu ita tau ba rai okos ne’e diak no seguru liu tenpu udan laiha problema, ita haree estrada moos no kapas liu no seguru ne’e mak ita tau fiu iha rai okos,” Tenik nia.

Nia esplika, Timor-Leste nia problema la’os ahi mate de’it, maibe ahi nia forsa enerjia mos la estabil.

“Ita nia ahi mate problema enerjia la estabil sa’e tun hela de’it, ne’e mos impedimentu ba iha investimentu, ema hakarak ita nia ahi estabil entaun ita presija hadia nia kualidade tuir orientasaun Primeiru Ministru nian ita komesa ona hahu husi BJ Habibie ba to’o Becora no timan oin ita sei komesa iha fatin seluk liu-liu dalan protokolu sira,” Nia informa.

Nia afirma,  agora mos halo sub-estasaun boot ida iha komoro hodi back-up, nune’e bele garantia katak sub-estasaun Komoro ne’e hotu no mos fiu iha rai okos ne’e finalize.

“Hau garantia la 100 pursentu, maibe 99%  ahi sei la mate hanesan agora,ne’ebé ita pasensia oituan sub-estasaun parese fevreiru ka marsu bele finaliza,” Nia relata.

Nia reforsa, istalasaun fiu rai okos ne’e faze dahuluk ho orsamentu montante miliaun $4 kompania Xineza ida ne’ebe iha esperensia barak kona-ba ne’e nian.

“Ita hare took ida ne’e hanesan projetu pilotu se ida ne’e ita konsege halo diak, tinan oin ita sei halo faze tuir mai, fiu ida dada iha rai okos ne’ebe kuaze mundu hotu implementa sistema ida ne’e, tanba seguru liu manutensaun baratu no estatika sidade diak liu, nia karun oituan mas prontu ita investe iha ita nia rai hodi garante kualidade, tanba ahi agora lakan, maibe enerjia tun-sae, la estabil, ema atu koloka fabrika mos hare hela ita nia enerjia ne’ebe sae tun ne’e,” Nia hakotu.