Ministru Komersiu no Indústria, Filipus Nino Pereira hatete, MKI hala’o ona monitorizasaun iha fulan Marsu nia rohan no haree katak laiha mudansa presu ne’ebé signifikativu iha merkadu ka loja sira.

Tuir Nino, koordenasaun ho distributór ai-han prinsipál sira no enkontru regulár sira ho Ministériu Koordenadór ba Asuntu Ekonómiku (MKAE) indika laiha aumentu ba folin.

Ba foos, nia dehan, foos saku ida ho kilograma (kg) 20 mak $8.50 to'o $14, enkuantu ba kg 30 ho folin $13.

Ministru hatutan, stok ai-han prinsipál sira iha armajen distributór privadu sira hamutuk tonelada 19.588.

Distributór prinsipál sira hanesan Creative Furak, Perisos, Lisun, no sira seluk asegura fornesimentu ne’ebé metin liu husi kanál distribuisaun, enkuantu Sentru Lojístika Nasionál (CLN) mantein rezerva maizumenus tonelada 3,000 ne’ebé prontu ba distribuisaun bainhira presiza.

Nia dehan, governu seidauk foti medida intervensaun espesífiku ruma, tanba kondisaun merkadu estavel nafatin.

Nino subliña importánsia adaptasaun sidadaun ba situasaun atuál no utilizasaun produtu lokál hodi hamenus dependénsia ba importasaun.

“Governu alerta ona par ita halo poupansa no ita mós tenke adapta ho mudansa ne'ebé mak agora iha.Ita konsumu ita-nia produtu lokal, hanoin ida ne'e sei fó valor liu ba ita-nia produtu rai laran,"katak nia