Ministru Juventude, Desportu, Arte no Kultura, Nelyo Isaac Sarmento hatete, MJDAK la autoriza estadiu munisipiu Dili ba federasaun atu uza tanba estádiu sira iha hela faze reabilitasaun.

“Se empreza halo hela reabilitasaun ita utiliza ba jogu, buat ruma aat empreza sira mai ho  orsamentu adisionál bebeik, entaun osan ne'e sa’e hela de'it, Governu tenke selu,” dehan Ministru Nelyo ba jornalista sira, iha nian kna'ar fatin, Kuarta (13/08).

Ministru esplika, problema sira ne'e akontese, tanba dala-ruma parte rua laiha koordenasaun, tanba ne'e ba futuru atu di'ak liu tenke iha koordenasaun.

“Tanba ne'e atu realiza atividade sira, ida ita tenke koordena malu ho di'ak. Ha'u fó ezemplu, federasaun sira seluk bainhira sira realiza kampionatu, antes atu la’o sira koordena uluk ho ministériu, tanba kampu sira sempre iha oráriu de uzu, nune'e presiza organiza halo didi'ak.”

Governante ne'e subliña, atu uza fasilidade estadu ni’an, tenke iha preparasaun no aprezentasaun antes ba Ministériu.

“Bainhira ita atu utiliza fasilidade estadu nia ida, primeiru ita tenke iha preparasaun uluk no halo aprezentasaun antes ba iha ministériu katak atu uza estádiu ida ne'e no ida ne'ebá, oinsa ho MJDAK nia haree, nune'e ita bele ko'alia no deside, labele fulan ne'e, atu realiza ona atividade mak mai husu autorizasaun,” Nia afirma.

Nia fundamenta, tanba  governu iha respinsabilidade ba infraestrutura sira komesa husi manutensaun, selu ema halo limpeza, selu seguransa buat sira ne'e.

“Tanba ne'e bainhira ita fo apoiu bainhira estádiu ne'e la uza, tanba ita labele fo autorizasaun ida katak, semanaa ida joga hela de'it, depois duut sira estraga hotu,”  Nia informa.

Nia aprofunda, esperensia ida mak estádiu Manatuto seidauk finaliza, maibé ministériu autoriza ba LFTL hodi hala'o jogu abertura ba liga futeból.

"Tanba ne'e husik ami hadia tiha lai, nune'e bainhira sasan sira ne'e ita hadi’a hotu ona, imi husu mai ita bele autoriza, se husi pedidu mai urjente hotu de'it oinsa mak ita bela autoriza, serake infraestrutura sira ne'e halo hela reabilitasaun,” Nia hakotu.

Molok ne’e, Prezidente Federasaun Futeból Timor-Leste, Nilton Telmo Gusamão dos Santos hatete, lolos situasaun ne’e labele akontese iha Ministériu Juventude, Desportu, Arte no Kultura, tanba FFTL husu autorizasaun  liu husi pedidu.

 “Ami nia pedidu hanesan atu uza estádiu Manatuto, ami hato'o ba ministériu iha loron 6 agostu, maibé ami la haten autorizasaun atu hala'o jogu finál, kazu hanesan mos iha Bobonaro sira halo pedidu ba MJDAK foin halo jogu, simu fali pedidu husi MJDAK atu hapara jogu,” Dehan Prezidente FFTL, Nilton liu husi Konferensia Imprensa, iha edifisiu FFTL, Tersa (12/08).

Maske MJDAK la autiriza kampu futeból sira iha munisipiu, maibé Asosiasaun munisipiu sira kontinua organiza, ezemplu konkreta horseik (segunda) halo jogu final juvenil sub-17 iha Manatuto, entaun Asosiasaun Futeból Manatutu deside hala’o joga deit iha kampu kiik ida ho rai rahun.

“Maibe ita triste oituan, tanba ita nia estadu investe tiha osan hodi konstrui estádiu iha munisipiu sira, nune'e Asosiasaun sira hakarak uza ba jogu, maibé ita nia Minstériu bandu fali, ida ne'e ita lamenta tebes,” Nia lamenta.

Nia afirma, se nune'e investimentu sira ne'e atu serve ba saida, serve ba ema ne'ebé atu joga futeból ka halo atu infeita deit munisipiu, atu dehan katak munisipiu ne'e iha estádiu ida.

Estádiu Manatutu nian, FFTL haruka karta pedidu rua ba MJDAK hodi husu autorizasaun, ida ba jogu abertura iha 13 jullu la aprova no karta fali ba jogu  final nian mós kontinua la aprova.

“Ita la hatene Ministériu Juventude, Desportu nia intesaun saida, atu hakarak para federasaun lalika halo atividade futeból iha ita nia rain ou iha buat ruma ne'ebé Ministériu sente FFTL tenke halo oinsa, tanba pedidu ami aprezenta, la’os de'it ba jogu munisipal, maibé ba selesaun nasionál ne'ebé sai ba li’ur, ita husu kampu sira atu treinu laiha ida mak aprova,” Nia preokuopa.

Nia haktuir, entaun preparasaun selesaun nasionál nian, halo deit iha kampu sira ne'ebé disponivel ho kondisaun ne'ebé minimu tebes.

“Ita hakarak halo kooperasaun diak entre federasaun ho ministériu, maibe ami sente iha bareira boot ida husi ministeriu ba federasaun, tanba ami hanesan ajente implementador, ne'ebe hakarak implemanta atividade desportu, ministeriu tenke hakuak no fó apoiu,” Nia afirma.