Nia dehan, CNC nia programa prioridade tolu iha tinan 2026 mak hanesan, funsionamentu dezenvolvimentu adisionál, kultura no patrimonia, no mós kombatente libertasaun.

"Ami hetan tetu fiskál tokon US$ 1.2, ami halo pedidu adisionál rihun US$ 900, ne'ebé se KRO aseita ne'e sa'e ba tokon US$ 2.2 ona," dehan nia, iha edifisiu Ministériu Finansas, horisehik.

Enkuantu ezekusaun 2025 agora to'o 52% husi orsamentu tokon US$ 1.5 no CNC garante ezekusaun orsamentu 2025 atinji tuir tarjetu tanba iha rekordu kada tinan ne'e CNC sempre atinji 95%.

Hugo hatutan, progresu signifikante mak CNC elabora manuál ba manorin istória hahú husi ensinu báziku to'o ensinu superiór, harii muzeu memoriál iha munisípiu sira, konstrui uma memória ba sobrevivente sira, fó bolsa estudu ba timoroam sira para kontinua sira-nia estudu liuliu ba vítima nia oan sira, entaun iha buat barak mak halo ona.

"Maski iha dezafiu maibé nafatin kontinua hanesan ita iha limitasaun orsamentu. Tanba, ita hakarak atu halo buat barak maibé ho orsamentu ne'ebé aloka limitadu, entaun ita labele halo buat hotu-hotu," nia hateten.

Nune'e, nia garante katak CNC nafatin fiar katak ho apoiu husi Governu no patrosinadór seluk nia kontribuisaun mak CNC sei kontinua halo nia servisu ho di'ak.