MJ Planu Kria Aplikasaun Online ba Atendementu Pasaporte Featured

By Ekipa INDEPENDENTE Novembru 29, 2023 3415
Jornalista Televizaun INDEPENDENTE halo hela entrevista esklusiva ho Diretór Jerál Servisu Notariado, João Fernando Martins Borges, iha Programa Ko'alia Sai, iha Studio 2 INDEPENDENTE, Hudi Laran, Dili, (29/11/23). FOTO:INDEPENDENTE. Jornalista Televizaun INDEPENDENTE halo hela entrevista esklusiva ho Diretór Jerál Servisu Notariado, João Fernando Martins Borges, iha Programa Ko'alia Sai, iha Studio 2 INDEPENDENTE, Hudi Laran, Dili, (29/11/23). FOTO:INDEPENDENTE.

DILI: Ministeriu Justisa liu husi Diresaun Jerál Servisu Notariado planu atu kria sistema online ba atendementu pasaporte, hodi hafasil liu sidadaun sira.

Tuir Diretór Jerál Servisu Notariado, João Fernando Martins Borges hatete, kestaun ne’ebé públiku sempre foti mak formatura ne’ebé naruk atu trata dokumentus liliu pasaporte.

Tanba ne’e, Ministeriu Justisa liu husi Diresaun Servisu Notariado halo ona koordenasaun ho Ajénsia Teknolojia Informasaun no Komunikasaun (TIC Timor,IP-Sigla Portugués), hodi deskuti ho tekniku sira husi notariado atu halo ba atendementu liu husi aplikasaun online.

“Ita buka ona meius seluk atu bele normaliza situasaun ne’e liu husi aplikasaun atendementu online,”dehan nia iha Programa Ko’alia Sai, iha Studio 2 INDEPENDENTE, Hudi Laran, Dili, kuarta ne’e (29/11).

Nia dehan, aplikasaun sistema online ne’e atu evita sidadaun sira ne’ebé trata pasaporte labele forma naruk no lakon tempu.

Nia akresenta, tuir planu, tinan ida ne’e, Diresaun Servisu Notariado sei halo rekrutamentu ba funsionariu sira, hodi bele koloka iha postu administrativu sira hodi halo atendementu ba sidadaun sira ne’ebé trata dokumentus.

Maibé orsamentu ne’ebé aloka ba Diresaun Servisu Notariado la sufisiente.

Nia dehan, tipu pasaporte iha oin haat mak hanesan, pasaporte komun, pasaporte diplomatika, pasaporte estrangeiru no pasaporte servisu.

Tuir diploma konjunta ne’ebé Ministeriu Justisa no Ministeriu Finansas fó sai, ba sira ne’ebé trata pasaporte durasaun loron 10 ho folin $50, loron 3 ho folin $75 no loron 1 ka 24 oras ho folin $100.

Entretantu, molok ne’e, Sistema Monitorizasaun Programa Judisial (JSMP-Sigla Inglés), husu ba Ministériu Justisa atu kria atendimentu pasaporte liu husi sistema online, nune’e bele evita sidadaun sira hobur-malu iha edifisiu Diresaun Jeral Servisu Notariadu.

Diretóra Ezekutiva JSMP, Ana Paula Marcal preokupa ho akontesimentu sidadaun sira sa’e moru DJSN hodi ba trata pasaporte.

Tuir nia, MJ, liu-liu DJSN presiza hadia sira-nia sistema atendimentu nune’e bele evita akontesimentu hanesan iha futuru.

“Ida ne’e sai trabalho de casa (TPC) ba sira atu nune'e haree ona nesesidade ne'ebé presiza, tanba iha Timor agora ema barak presiza pasaporte," dehan nia ba jornalista sira iha Timor Plaza, Kinta (23/11).

Tuir nia, iha era agora, loloos tenke adapta ona ba dijitalizasaun, tanba sistema manual ne’e nia tempu liu ona.

"Hanesan foin lalais ita haree inan-ferik sira no alin-feto sira sa’e moru, ita haree ida ne’e triste. Ho nune'e husu nafatin ba governante sira hadia sistema atendimentu ida ne’e, tanba tuur iha ne'ebá atu servi povu," katak nia.

Rate this item
(1 Vote)
Last modified on Kuarta, 29 Novembru 2023 13:53

Independente Digital TV