Nia dehan, la'o daudauk hela, ADN halo hela servisu, tékniku halo hela servisu.
"Ita bele konklui buat ruma, se ita la halo tanba ne'e bele ongoin ba iha prósimu anu ne'ebé mai. Ita apropria orsamentu ba iha ida ne'eba atu fó kontinuidade to'o ita nia programa nonu governu konstitusionál ninian 2028".
"Se hotu lalais di'ak liu, mais se la konklui pelumenus ita iha tarjetu ruma to'o 2028 bele konklui," dehan Ministru Justisa, Sergio Hornai ba jornalista sira hafoin enkontru ho PR Horta iha Palásiu Prezidensiál Bairu-Pite, Tersa (30/09).
Antes ne'e, iha loron 16 Janeiru 2025, Ministru Justisa, Sérgio Hornai, hatete Ministériu Justisa (MJ) sei deside dezeñu Bill of Quantity (BOQ) ba konstrusaun Sentru Juvenil ne'ebé sei hahú tinan ne'e.
"Kona-ba konstrusaun Sentru Juvenil ne'e, ikusliu ha'u hala'o reuniaun ida ho Konsellu Administrasaun Fundu Infraestrutura (KAFI) hodi ko'alia kona-ba dezeñu BOQ ba Sentru Juvenil. Ita hakarak iha dezeñu di'ak ba konstrusaun. Tanba ne'e, ita deside tinan ida- ne'e mak ita hahú fali nia dezeñu BOQ," hatete Sérgio Hornai.
Nia dehan, Ministériu Justisa tinan ne'e fó prioridade ba projetu boot rua, mak hanesan konstrusaun ba prizaun boot iha Weberek no konstrusaun Sentru Juvenil ne'e rasik.
"Teknikamente sira (KAFI) mak haree ida- ne'e maibé politikamente ita manifesta ita- nia interese para bele dezeña BOQ ho detallu," nia hatete.
Entretantu, fatin ba konstrusaun Sentru Juvenil, Ministériu Justisa indika ona rai iha Suku Tibar, Postu Administrativu Bazartete, Munisípiu Liquiçá, nu'udár fatin ba futura instalasaun Sentru Juvenil, ne'ebé sei gasta orsamentu estadu ho montante millaun $ 1.
