“Governu nia atendementu ba ema ho defisiensia sira sei lenuk hela, no sira hatene katak ema ho defisiensia vulneravel tebes. Dala ruma liña ministeriais sira atendementu ema ho defisiensia sira ladun sensibilidade inklusivu no ponte ne'ebé sira halo iha Kuluhun seidauk sensibilidade ba defisiensia sira,” afirma Jestor Programa Open the Book CGT-TL, Sabino Fitun, hato’o asuntu ne’e ba Jornalista sira iha salaun HAK Farol (30/09).

Kona-ba atendimentu ba EhD sai diak liu tan, nune’e CGT-TL realiza sosializasaun kona-ba planu Asaun Nasional ba ema ho defisiensia sira no autoridade lokál suku sira iha Munisipiu Dili.

"Atividade ida ohin ne'e, ita halo sosializasaun kona-ba Planu Asaun Nasional ba ema ho defisiensia no mos Autoridade lokál sira husi Munisípiu Dili," nia hatutan.

CGT-TL konvida xefe suku sira ne’e ho objetivu atu fahe informasaun ba sira, tanbá iha Munisipiu Dili SEATOU sobu komunidade sira nia uma no mós ema ho defisiensia sira nia uma.

"Ita hakarak fahe esperensia Autoridade lokál sira, tanbá iha suku ida iha Bebonuk Governu halo tratamentu ba ema ho defisiensia ida ladun dignu," nia argumenta.

Tanba tuir nia, bainhira koalia direitu ema ho defisiensia presiza governu tenke tau matan ba asuntu ema ho defisiensia kuandu governu halo eviksaun ba malu defisiensia sira nia uma.

“Iha situasaun ema ho defisiensia sira mak Vulnerável liu defisil atu asesu ba buat ruma, ita fo informasaun ba autoridade lokal sira oinsá atu salvaguarda ba komunidade no mos defisiensia sira,” nia subliña.

Tantu tuir Planu Asaun Nasional ba ema ho defisiensia sira presiza hatene, tanba governu desde 2008, no kria Planu Asaun Nasional ba ema ho defisiensia 2023 to'o 2030.

“Atu haree ema ho defisiensia sira nia nesesidade no kada tinan governu tau osan ka lae , entaun dala ruma Autoridade lokal sira la hatene no sira nunka informa ho situasaun sira ne'e, oinsá sira halo Komunikasaun ho governu halo tuir nesesidade ba ema ho defisiensia.”

“Dala barak Autoridade lokal sira seidauk hatene kona-ba asuntu ema ho defisiensia, tanbá Ministériu relavante sira la halo sosializasaun kona-ba planu Asaun Nasional ba ema ho defisiensia,” nia esplika.

CGT-TL realiza atividade kona-ba ema ho defisiensia sira nia preokupasaun kona-ba insfraestratura sira iha kapital Dili, oinsá Xefe Suku sira komunika ho Governu halo desenvolvementu tuir nesesidade ema ho defisiensia sira hodi halo movimentu ba mai iha kapital Dili.

Entretantu, CGT-TL inisia atividade ida ne'e atu nune'e sira trata ho dignu komunidade no mos ema ho maluk defisiensia sira.