Diretór Jeral Administrasaun Finansas-ME Antoninho Pires hatete, ME hato'o ona ba KFP, maibé KFP seidauk fó sai resposta konaba pagamentu refere, bainhira KFP konfirmadu ona mak Ministeriu Edukasaun sei halo pagamentu ba manorin sira ne'e.

Nia hatutan, Ministériu Edukasaun (ME) iha duni osan no vagaturas mak fó kontratu ba profesores sira. Tanba ne'e atu halo pagamentu ba sálariu manorin sira nian ME sei hein konfirmasaun husi Komisaun Funsaun Públika.
Nia dehan, manorin voluntáriu sira ne'ebé asina ona kontratu iha fulan-Abril 2023 sei simu saláriu liu husi Ajentes Administrasaun Públika (AAP).
"Ba profesor sira ne'ebé ami fó kontratu seidauk simu saláriu tanba sei hein konfirmasaun husi KFP. To'o agora ami hato'o ona ba KFP atu nunue'e KFP bele konfirma, tanba profesores sira nia saláriu simu liu husi AAP," dehan nia ba Online INDEPENDENTE, iha knar fatin, Ministeriu Edukasaun, Vila-Verde, (11/07).
Entretantu, Ministériu Edukasaun (ME) antes ne'e loke vaga, manorin hamutuk hamutuk 2.000 mak konkore maibé 1.700 mak prense vaga refere.
Enkuantu, husi dadus ne'e ME fahe ba parte rua hanesan, manorin 1.400 ba hanorin iha Pre-Eskolar to'o Ensinu Sekundária iha teritoriu laran tomak no atus-tolu (300) ba Profesores eskola uma nian ne'ebé iha Munisipiu Díli.