Nia dehan, governu seidauk foti desizaun tanba ne'e seguransa sira-ne'e sei mantein to'o governu foti ona desizaun foin bele haree.

"Sim, iha lei pensaun mensál vitalisia ne'e sita katak sei dada hotu seguransa sira. Mais ami ko'alia tiha ona katak hein lai to'o governu foti desizaun, governu seidauk foti desizaun,", dehan MI iha Palásiu Governu, Tersa (30/09).

Nia hatete, tanba iha lei ne'e dehan katak fo fulan ida ba governu halo tranzisaun ka lae no prepara kondisaun hafoin bele dada seguransa sira-ne'e.

"Tanba ne'e mak ha'u informa tiha ona ba komandante jerál katak mantein lai polísia sira fo seguransa ba ita-nia eis titular sira-ne'e, to'o desizaun governu foti ona no aprova ona prontu ne'e mak ita foin haree to'ok,". Nia esplika.

Nia hatutan, eis titular sira-ne'e mesak sira ne'ebé uluk luta ba rai ida-ne'e, tanba ne'e governu tenke konsidera no haree didi'ak molok foti desizaun.

"Depois ita haree eis titular ne'e sé, ema sira uluk luta ba rai ida-ne'e, mate ba rai ida-ne'e, sira ne'e mak uluk hamrik iha ita-nia oin, lori rai ne'e ba ukun an tiha, ita mós tenke konsidera sira-nia luta ida-ne'e, ema sira-ne'e uluk ailaran hotu fo an ba mate tan rai ida-ne'e, agora tanba de'it lei ne'e ita dada ne'e lae, ne'ebé lei ne'e fo hela 30 dias prontu ami sei hein desizaun, agora mantein nafatin lai," tenik MI.

Komandante Unidade Espesiál Polísia (UEP), Superintendente Polísia Damião Correia, hateten, to'o agora Komandu Jerál seidauk iha despaxu ida atu dada fila Korpu Seguransa Pesoál (CSP, sigla portugés) husi eis titutár sira.

"Agora ami seidauk implementa, ami kuandu implementa kuandu desizaun husi Ministru Interiór mai Komandante Jerál no Komandante Jerál depaisa ona mai ami katak retira membru sira-ne'e mak ami foin ezekuta. Maibé to'o agora ami seidauk bele ezekuta ida-ne'e." Daniel informa.

Nia esplika, to'o agora seidauk iha desizaun definitiva ruma husi Komandu Jerál no daudaun ne'e membru CSP ne'ebé fó hela seguransa ba eis-titulár sira kontinua halo sira-nia servisu hodi fó seguransa ba eis titulár sira, to'o hein desizaun husi Komandu Jerál.

"To'o agora Komandu Jerál seidauk bolu ami atu ko'alia kona-ba implementsaun, kuandu Komandante Jerál iha ona desizaun ba ida-ne'e, entaun nia sei bolu Komandante Unidade atu ko'alia kona-ba implementasaun," nia informa.

Nia realsa, desizaun sira hanesan ne'e la'ós responsablidade mesak husi Komandu Jerál, maibé Ministru Interiór mak sei foti, depois mak manda karta ba Komandu Jerál no Komandu Jerál despaisa ba Komandante Unidade Espesiál Polísia hafoin ezekuta.

"Kuandu karta ne'e to'o ona Komandante Jerál, sei bolu ami enkontru. Ami sei hein orden husi husi Komandante Jerál. Agora membru CSP sira-ne'ebé mak halo seguransa ba eis-titulár sira sei mantein, hein orden ikus husi Komandante Jerál, tanba ba ida-ne'e Komandante Jerál mak fó orientasaun, ne'e klaru katak presiza liuhusi karta ruma,” nia konklui.