MESSK Suspende Aula Prezensial, Inklui Graduasaun UNTL Featured

By Agostino Santos Gama Agostu 26, 2021 356
Vise-Reitor Asuntu Akademika no Garantia Kualidade, UNTL, Samuel Venancio Freitas. Foto:Agostino/Independente. Vise-Reitor Asuntu Akademika no Garantia Kualidade, UNTL, Samuel Venancio Freitas. Foto:Agostino/Independente.

DILI: Ministeriu Ensinu Superior Siensia no Kultura (MESSK), deside hodi suspende aula prezensial ba estudante ensinu superior sira, inklui mós graduasaun ba faze daruak iha Universidade Nasional Timor-Lorosa’e (UNTL).

Hafoin desizaun Konsellu Ministru, impoin hikas konfinamentu domisiliariu jéral iha Kapita Dili hahú iha oras 00:00, loron 27 fulan-Agostus to’o oras 23:59, loron 2 fulan-Setembru tinan 2021.

Ministru Ensinu Superior, Longuinhos dos Santos hatete, Ensino superior sei haruka karta ba Universidade públiku no privadu sira atu nune’e, provizoriamente suspende lai atividade aula prezensial.

“Ita ko’alia kona-ba konfinamentu obrigatóriu signifika obriga ema hotu atu labele sai no aktividade hotu tenke suspende, liuliu kona-ba Aktividade letivas ensinu superior, e ha’u mós hetan ona karta husi Ministériu Saúde atu halo suspensaun ba atividade letivas no ha’u sei halo karta atu sirkula ba Universidade hotu tantu publiku no privadu, atu bele suspende hikas atividade letivas sira”,dehan nia iha Palasiu Governu, kuarta horseik (25/08).

Aleinde, suspende mós serimonia graduasaun faze daruak ba UNTL, ne’ebé tuir planu atu realiza iha loron 27 fulan-Agostus tinan 2021.

Entretantu, Vise-Reitor Asuntu Akademika no Garantia Kualidade, UNTL, Samuel Venancio Freitas hatete, UNTL hetan ona despaixo husi MESSK atu suspende aula prezensial no mós adia graduasaun faze daruak ba graduadu hamutuk na’in 349.

Tanba ne’e, nia parte sei kumpri desizaun ne’ebé MESSK fó sai hodi suspende atividade iha Ensino superior.

 

Asistente Editor: Saturnina da Costa

Rate this item
(0 votes)
Last modified on Kinta, 26 Agostu 2021 18:22

Independente Digital TV