Menus Komprador, Modo no Tomate La Folin Featured

By Mariano Mendonça Marsu 17, 2021 2197
Modo sira iha merkadu. Modo sira iha merkadu.

DILI: Vendedór sira iha Merkadu Taibesi sente triste tanba modo no tomate ne’ebé sira fa’an la folin, relasiona ho aplikasaun serka sanitária no konfinamentu obrigatóriu.

Nu’udar negosiante ne’ebé faan modo no tomate iha merkadu Taibesi, Ozorio Noronha Belo husi Munisípiu Baucau, Postu Administrativu Laga hateten, situasaun ne’e halo sira nia rendimentu menus no produtu barak maka la folin tanba laiha ema atu sosa.

“Ami ba hein tomate iha Metinaro ne’ebá, bainhira ema lori husi Baucau mai, ami ba sosa tutan kunci mas ida $15, maibé ho situasaun ne’e ami lori mai faan la folin liu, entaun ami lakon rendimentu, ema atu halo movimentu. Ami trites tebes tanba produtu hanesan modo no tomate ne’e ita labele rai to’o semana, ne’e duni kuandu ema la sosa ami lori ba so’e, dehan Ozoriu iha nia faan fatin merkadu Taibesi, (16/03).

Nia haktuir, tomate no modo ida barak hanesan ne’e aat hotu tenke ba soe, tanba produtu ida ne’e sei la dura to’o semana.

“Ami la’os la konkorda desizaun governu nian, ami mós hatene katak moras ne’e la di’ak ba ita nia saúde, maibé ami halo tu’ir ona regras ne’ebé governu fó sai, maibé polisia duni ema iha fatin fatin entaun ema tauk hotu atu mai merkadu, tanba ne’e ami husu estadu hare mós problema ne’e,” tenik nia.

Entretantu Vendedór, Juvita da Costa Pereira hateten, komesa aplika serka sanitariu sasan barak la folin no produtu barak laiha tanba husi munisípiu labele hatama mai.

“Ami hakarak husu governu sei bele karik tau matan ba ami povu ki’ik, tanba ami faan sasan maka sustenta ami nia uma laran ida ne’e mak ami nia difikuldade boot, se bele karik governu fó dalan ema sira husi munisípiu semana ida hatama sasan maid ala rua nune’e ami bele hetan sasan, sela’e komesa ba oin modo sira sei laiha,” tenik nia.

Nia dehan, langanan sira atu hatama sasan mai la di’ak, entaun sasan menus konserteza rendimentu mós menus. Modo tahan iha ne’e folin hanesan bain bain, uniku tomate maka folin komesa karun uluk balde ki’ik $ 2 agora sa’e ba $ 5 tanba sasan araska, estadu hanoin didi’ak bele fó netik semana ida hatama modo husi munsípiu sira mai dala rua.

Ihan fatin ketak, Negosiante Ambulante Gagriel Guterres ne’ebé faan nú iha Igreja Motael nia oin hateten, komesa governu desidi serka sanitaria nú ema nunka mai sosa.

“Ita bo’ot sira bele hare rasik ho matan, dala ruma ami ko’alia ema dehan bosok, maibé ita boot sira (jornalista) hare ba, nú namlaek hela hanesan ne’e, laiha ema atu sosa,” dehan Gabriel.

Nia haktuir, situasaun ne’e grave duni, hanesan negosiante sente araska osan iha tempu hanesan ne’e, povu kritika demais estadu mós ladun di’ak, estadu foti medida sira atu evita moras Covid-19, mais nia impaktu maka hamonu ekonomia familia.

Rate this item
(0 votes)

Independente Digital TV