Tuir Ministru Edukasaun Juventude no Desportu (MEJD) Armindo Maia hatete, programa eskola ba uma ne’e sei implementa liu husi Radiu, Televizaun, Online no Youtube, atu nune’e fasilita estudante sira hodi estuda iha uma.
“Ita implementa ona programa eskola ba uma ou lansamentu eskola ba uma no tele-eskola ba siklu 3, eskola sekundaria jeral inklui tekniku vokasaional ho ida ne’e ita nia estudante sira bele assesu aprendijazem liu husi, televizaun eskola ba uma ou tele-eskola, youtube Eskola ba uma, Facebook eskola ba uma, no aplikasaun eskola ba uma,”dehan Ministru iha nia deskursu, iha ambito sermonia lansamentu programa “Eskola Ba Uma,’salaun MEJD, Vila Verde Dili, (31/03).
Iha tinan kotuk (2020) MEJD lansa ona programa dahuluk Eskola ba Uma, maibé iha tinan ida ne’e kazu covid-19 aumenta kada loron ho numeru ne’ebé as. Tanba ne’e posibilidade MEJD sei suspende nafatin atividade prezensial iha eskola no fatin ba funsionariu iha tempu naruk, atu garante prosesu aprendijazen.
MEJD mós sei kompleta materia sira ba ensinu baziku terseiu siklu nian no ensinu sekundariu jeral inklui ensinu sekundaria tekniku vokasional.
Materia sira sei distribui ba parte hotu, liuliu ba media nasional sira hanesan elektorniku, inprime no online atu fahe no fó sai materia sira ne’e.
Iha fatin hanesan, Kordenador Kurrikulum Nasional, Pedro Ribeiro Gonçalves reforsa tan katak, implementasaun programa eskola ba uma ne’e ba eskola sira ne’ebé durante ne’e MEJD suspende ona sira nia prossesu aprendijazem hanesan iha munisipiu Vikeke, Baucau no Dili.
Maibé ba eskola sira ne’ebé la implementa serka sanitaria ne’e kontinua nafatin sira nia prossesu aprendijazem tuir kalendariu MEJD.
“Ita nia programa ida ne’e implementa deit ba eskola sira ne’ebé mak durante ne’e ita nia governu implementa serka sanitaria no ba eskola sira ne’ebé mak la implementa serka sanitaria ne’e kontinua nafatin sira nia prossesu aprendijazem hanesan baibain, no sira sei realiza ezame ba dahuluk nian iha loron 17 fulan abril tinan 2021 ne’e,”dehan nia.
Jornalista: Saturnina da Costa
Editor: Jose Sarito Amaral
