Nia hatutan, sei iha tan verifikasaun balun maibé husi parte tékniku ministériu nian kompleta ona dadus no rekizitu agora daudaun iha ona Ministériu Finansas (MF), nune’e ekipa fundu Covid-19 bele deside.

Prosesu orsamentu ba MAP nian tékniku sira hatama hotu ona, rekizitu ne’ebé MF presiza daudaun hatama hotu ona, iha Sesta (22/5), aprezentasaun ikus husi MF nian parese sei iha mudansa uitoan, maibé tékniku sira mós sei halo ajustamentu ba mudansa hirak nune’e bele la’o tuir rekizitu.

Orsamentu Covid-19 tokon $4.9 ne’ebé aloka mai MAP nia hodi hasa’e produsaun ai-han nian seidauk sai, maibé MAP servisu iha kampu kontinua halo nafatin hodi motivu agrikultór sira, agradese boot ba natar na’in no to’os na’in sira ho vontade tomak hodi komesa kuda batar ba époka daruak nian.

Nia afirma preparasaun mak agora daudaun ne’e kuda ona ektare rua (2), hein tan orsamentu Covid-19 nian ne’ebé prevé ona MAP sei aumenta kuda ektare neen (6) no mós iha fatin seluk. Aleinde kuda, iha Munisípiu Suai mós inísiu fulan Juñu sei kolleta batar ektare 700, no ektare ida (1) iha Maliana maka kolleta ona.

Nune’e, iha fatin seluk hanesan iha Larisula-Baguia, Munisípiu Baukau, MAP liuhusi grupu agrikultór kuda ona ektare 400 ba evoka daruak nian, maibé tanba udan boot no mota tun maka estraga irrigasaun Larisula nian.

Maski nune’e, MAP sei halo tan mobilizasaun mákina atu bele normaliza fila-fali hodi bele asegura ektare 400 ne’ebé foin kuda iha Larisula ne’e.