Diretór Servisu Sentru Saúde Manatutu, Mateus Vicente Correia hatete, kazu ne’ebé sentru saúde manatutu rejista moras hahú husi fulan-Janeiru to’o agora ne’e iha kazu barak liu mak ISPA tuir mak diárea maibé maioria ne’e pursentu 80 mak moras ISPA.

“Kada loron ami tenke rejista moras ISPA ne’e iha 50 pessoas mak afeita hela ba moras ISPA, moras ISPA ne’e kuaze barak liu mak labarik sira tama ho idade 12 to’o 15 mak barak liu”, dehan Mateus ba jornalista INDEPENDENTE, via telemovel, tersa (05/05).

Ho idade 20 afeita fali ba sira ne’ebé idade 40.  Fatór husi labarik barak mak halimar rai-rahun afeita ba sira nia saúde mak hanesan me’ar, inus metin no asma.

Aleinde ne’e, sentru saúde Manatutu mós rejista moras dengue hamutuk na’in 18 labarik iha na’in 13 no ema boot na’in lima (5), ne’ebé rejista hahú husi loron 3 fulan-Abril to’o agora maibé konsege resolve.

Dadaun ne’e Timor-Leste iha hela kondisaun estadu emerjénsia entaun afeita hela ho klima ida ne’e maske iha munisipiu Manatutu malaria laiha maibé iha dengue mak agora sa’e uitoan maibé konsege haruka ekipa tuun hodi halo kedas intervensaun.

“Ami iha saúde munisipiu prontu atu bele atende kualker se de’it mak afeita ba moras sira hanesan moras dengue ida ne’e ami iha preparadu atu fó atendementu, atu hatete katak moras dengue ne’e ai-moruk laiha maibe ita tenke simu parasetamol atu nuune’e bele hemu”.

 Sentru Saúde Manatutu iha fatin hodi halo tratamentu ba pasiente sira ne’e sufisiente atu responde ba kestaun hirak  ne’e bainhira mak pasiente ne’e detekta katak nia labele responde iha munisipiu Manatutu entaun sei halo transmisaun ba iha Hospital Nasional Gido Valadares Dili.