Portavoz Sentru Integradu Jestaun Krize (SIJK) Doutór Rui Maria de Araújo hatete, hafoin kazu konfirmadu 24 rekuperadu hotu Timor Leste la deteta tan kazu foun.

Hahu husi loron 6 fulan-Marsu to’o ohin loron ema ne’ebé halo ezame laboratóriu hamutuk 1.833 maibé laiha kazu foun.

“Ema ne’ebé nia rezultadu laboratóriu negativu hamutuk 1.809 no ema ne’ebé sei hein rezultadu laboratóriu hamutuk 24,”dehan nia liuhusi konferensia imprensa iha CCD, ohin.

Nia esplika, total ema ne’ebé sei iha konfinamentu obrigatóriu hamutuk 121 kompostu husi autokuarentena na’in 48 husi Dili 27 no iha munisípiu 21 nomós ema ne’ebé halo konfinamentu obrigatóriu iha fasilidade governu nian hamutuk iha Dili hamutuk 49 no iha munisípiu sira seluk 29. No ema ne’ebé liu ona period konfinamentu hamutuk 2.457 kompostu husi Dili 1.935 no na’in 522 iha munisípiu sira seluk.

Nia mós apela ba públiku atu nafatin kumpri protokolu husi Ministériu Saúde (MS) no Organizasaun Mundial Saúde (OMS) hodi fase liman bebeik no mantein distansiamentu sosial no uza maskara.