Jenerál Reformadu, Lere Anan Timur husu jovens sira estuda no kria estabilidade rai laran hodi aselera dezenvolvimentu.

“Imi jovens sira feto no mane imi mak sai futuru nasaun ninian, imi mak sei kaer kuda-talin, aban-bainrua nasaun atu sai diak ka at iha imi nia liman, mais ami nuudar katuas, lider nasaun nian, tenke kria kondisaun, hanesan dala ida karik, loke dalan ida ne’ebé diak no mos  atu imi bele tuir,” Deklara Jenerál Lere Anan Timur, Bainhira Sai Oradór  ba seminariu nasionál ho Tema “Um Olhar Interior Timor-Leste Em 20 anos Atrás e no Futuru, ne’ebé organiza husi Grupu Kadalak, iha salaun Katedrál, Vila-verde, Kinta (19/05).

Veteranus Lere hatene intelektual jovens barak  preokupasaun ba nia futuru, maibé see haree situasaun politika  iha rai laran, ladun diak, nain ulun sira mós dala ruma, lakohi dialogu, lakohi tuur hamutuk  atu to’o hanoin ida.

Maibé husu jovens sira labele lakon esperansa hodi kria instabilidade iha rai laran.

“Imi baku malu no oho malu  liuliu artemarsiais  foin lalais iha UNPAZ  no DIT, Hau  horseik iha UNDIL  ne’ebé hau hateten imi jovens sira atu mai eskola ka atu sai at liutan,  atu mai eskola, la’ós atu mai baku malu, la’ós lori artermarsiais mai eskola,” nia hateten.

Tuir nia, ohin loron bele dehan katak moris iha país ida ne’ebé demokrátiku tebes,  entaun dala ruma hakat liu demokrásia  no liberdade, maibé tenke hadomi malu no respeitu malu.

“Dala ruma ita rona ona Apa ho Ama, dala ruma ita ho ita la rona malu, maibé hau hanoin katak jovens, ida-idak tenke toma konsiensia, see uluk ami ai laran diak moris iha terus laran, ami nia maluk barak mate iha ami nia sorin-sorin, maibé ami ne’ebé ke sei moris, ami hadomi nafatin,” nia informa.

Nia hateten, dala ruma iha ne’e loro monu no lorosa’e, rai laran  no Oe-kussi no balun komesa ko’alia loro-monu no lorosa’e,  maibé uluk iha ai laran biar  lian mak lahanesan, maibé  laiha loro-monu no lorosa’e.

“Timor  ne’e kiik  no foin ukun an 20, maibé iha problemas barak, Tanba ne’e mak jovens sira tenke estuda  no eskola, rona Apa no Ama no rona professor sira atu nune’e aban-bainrua bele lider diak,” nia informa.

Nia  mós preokupa ohin loron jovens kontinua buka nia moris iha ema nia rain,tanba estadu seidauk kria kampu servisu ba sira, maibé jovens sira labele lakon esperansa kontinua estadu, futuru nasaun sei jovens sira nia liman.

“Ohin jovens barak iha ema nia rain, tanba buka sira moris, maibé ita labele kompara Timor-Leste ho Cabo Verde,” nia hateten.

Nia fundamenta,  tanba Cabo Verde ne’e rai molik, atu halo toos no natar difisil, entaun sira manan masin  ne’e deit, tanba tasi haleu sira. atu buka osan tenke ba buka iha  li’ur, Esporta ema, depois ema importa osan ne’e.

“Timor-leste mós hanesan Esporta jovens sira ba liur, atu sira importa osan mai rai laran, maibé ita la’ós hanesan Cabo Verde, tanba Timor-leste riku, timor-leste rai ne’ebé ema hot-hotu gosta,” tenik nia.

Iha hanesan, Sekretariadu Grupu Kadalak, Vitorino Domingos Soares hateten, Grupu Kadalak organiza seminariu nasionál ho objetivu jeral mak atu valoriza no habelar espiritu 20 maiu nian.

“Ami hanoin katak reflesaun ne’ebé mak grupu Kadalak foti 20 maiu ida ne’e hanoin katak lori juventude sira oinsa mak atu bele reflete fila-fali tinan 20 ba kotuk no halo projetu ba tinan 20 depois restaurasaun independensia,”dehan nia.