Vitima ho inisial MdJ ne’ebé foin ho idade tinan 17 hola ona mane tenke simu konsekuensia todan.

Tuir vitima nia inan, bainhira kazu ne’e akontese nia iha hela toos. Bainhira fila mai, nia haree nia oan-feto ne’e toba iha hadak leten ho raan iha isin.

Maske hakfodak, Juliana sei konsege husu ba nia oan feto ne’e tanba sa mak nia bele hetan kanek.

Nia oan feto konta katak, nia laen mak ta’a hafoin mosu diskusaun la vale ida entre sira na’in rua.

“Nia hatan mai ha’u ‘ama, ami la problema ida, koalia haksesuk malu uitoan de’it mak nia hamriik mai tebe iha ha’u-nia sorin, ha’u monu ba rai no nia foti katana atu ta’a ha’u, ha’u foti liman liman baku iha nia liman sikun, maibé labele tahan tanba nia forsa maka’as liu, ne’ebé nia ta’a ha’u nia ulun, haree raan sai barak ha’u hakilar, nia mós halai’,” Juliana konta tuir nia oan nia lia-fuan.

Juliana mós sente konfuzaun ho asaun husi nia mane foun ne’e, tanba tuir nia durante ne’e nia oan feto ho nia laen nunka iha problema.

Iha fatin ketak, Komandante PNTL Munisipiu Manatuto, Superintendente Julia Gama afirma katak, mosu duni kazu laen ta’a feen iha Bahareduk.

Nia dehan, hafoin nia parte simu informasaun, nia orienta kedan Polisia patrulamentu ho forsa rezerva hodi ba fatin akontesimentu.

Bainhira to’o iha fatin akontesimentu, nia dehan, suspeitu halai lakon ona, no polisia ho lalais lori vitima ba ospital Manatuto hodi halo tratamentu.

"Provizoriumente ami husi seguransa sei halo akordu ho administradór postu no xefe suku sira no komunidade iha postu Laklubar hodi buka tuir suspeitu ne'e to’o hetan. Nia sei ba hatan iha tribunal,” dehan nia.