“Tuir relatório ne’ebé ami halo, kada tinan ha’at, Ministeriu Finansa no INDDICA ne’ebé halo servisu oinsa atu haree ba situasaun labarik sira nian, hanesan, edukasaun, má-nutrisaun, saneamentu no hijiene, inklui prevensaun no protesaun ba labarik sira iha Timor-Leste,”dehan nia ba jornalista sira salaun Ministeriu Finansas, Aitarak-Laran, tersa ne’e (24/05).

Nia hatutan, iha relatoriu ne’e deskreve situasaun labarik sira ne’e hatudu 48% labarik sira husi populasaun Timor-Leste sofre hela ba má-nutrisaun no moris iha kiak nia laran.

Nia haktuir, labarik sira ne’ebé hetan má-nutrisaun ne’e kauza husi ekonomia uma-laran ne’ebé fraku no mós sira ne’ebé iha pobreza nia laran.

Tanba ne’e, nia dehan, dadaun ne’e, governu iha ona politika ida atu servisu hamutuk ho INDDICA no mós liña ministerial sira hodi haree programa má-nutrisaun iha Timor-Leste.

Nia akresenta, ministério haat ne’ebé sei tau matan ba situasaun labarik sira iha TL mak hanesan, Ministeriu Saúde, Ministeriu Solidariedade Sosial no Inkluzaun, Ministeriu Justisa no mós Ministeriu Edukasaun Juventudu no Desportu.

Maibé, nia dehan, la taka dalan mós ba ministeriu sira seluk, atu fó apoiu ba dezenvolvimentu labarik sira nian.

Nia esplika, tuir dadus sensus uma-kain tinan 2015 hatudu, total populasaun iha Timor-Leste hamutuk millaun 1 resin, husi númeru ne’e 50% maioria labarik.

Tanba ne’e, INDDICA sei kontinu halo sensibilizasaun, advokasia no promosaun ba populasaun atu hotu hodi hasa’e sira nia kuiñesementu, hodi garante ba moris dignu labarik sira nian.