Prezidente KSTL, Almerio Villa Nova hatete, fallansu selu ‘gaji 13’ tuir tempu indika jestaun orsamentu ne’ebé fraku iha governu nia laran.

Nia afirma, kondisaun ne’e fó impaktu tebes ba funsionariu ho salariu kiik ne’ebé depende sira-nia nesesidade moris ba salariu adisional refere.

"Ami akompana informasaun ba Diresaun Nasional Seguransa Sivil ho funsionariu kontratu lubuk ida mos la hetan direitu gaji 13 nian," dehan nia ba jornalista INDEPENDENTE via telefone, Segunda (31/12/2025).

Tuir Almerio, Governu falla fó prioridade ba funsionariu vulneravel, enkuantu funsionariu nivel altu la hetan impaktu husi problema ne’e.

Nia hatutan, loloos instituisaun governu tenke asegura uluk gaji 13 ba funsionariu sira ne'ebé level kiik, tanba sira mak risku liu no vulneravel.

“Diretór, asesor ho ministru no sira ne'ebé tuur pozisaun a'as ne'e la hetan gaji 13 laiha problema ida,” dehan nia.

MKI promete selu iha Janeiru

Ministru Komérsiu no Indústria (MKI), Filipus Nino Pereira, garante katak iha Janeiru 2026 ne’e nia sei rezolve problema gaji 13 ba funsionariu iha ministériu ne’ebé nia lidera.

"Balun-balun hahú selu daudaun ona,no balun ne'ebé seidauk simu ita sei halo pagamentu iha fulan Janeiru nian,"dehan Nino iha Rotunda Prezidente Nicolau Lobato, Komoro,Segunda (31/12).

Vise PM: Ne’e problema jestaun

Vise Primeiru Ministru, Ministru Kordenador Asuntu Sosial, no Ministru Dezenvolvimentu Rural no Abitasaun,Marinano Assanami Sabino hatete katak gaji 13 nu’udar direitu ba funsionariu sira no governu sei kontinua garante.

“Iha problema jestaun de'it.Imi hotu hatene katak baibain salariu 13 uluk ne'e iha Ministeriu Finansas lá'os iha Ministeriu idaidak, polítika ikus ne'e lei muda idaidak iha Ministeriu ne'ebé presiza re-ajusta de'it, ne'ebé laiha problema ida,mais problema tempu de'it, presiza jestaun,"dehan nia.