La’ós de’it kestaun dezempeñu servisu, tuir KSTL, kompaña mós laiha edifisiu, nune’e bainhira iha kazu ruma hasoru trabaladór defisil tebes ba KSTL atu hasoru parte kompaña, no sira tenke ba hasoru fali parte Ministériu Saude (MS).
Vise Prezidente KSTL, Berta Hornai Neto hatete, hahú husi tinan 2024 to’o 2025, KSTL simu keixa husi trabaladór na’in 65 tanba durante fulan tolu resin kompaña la selu sira-nia salariu.
Bainhira simu keixa ne’e, nia dehan, nia parte koko hodi buka kompaña nia fatin atu bele halo mediasaun, maibé sira buka la hetan.
"Ha'u la hatene kompañia ne'e nia office ho ninia Diretór ba kompañia ne'e, tau iha pasta ka tau iha ne'ebé ha'u la hatene. Kompañia Evip Marel ne'e la di'ak tanba nia manan tender maibé selu traballadór ne'e tarde liu. Dala-ruma fulan rua, fulan tolu mak foin selu," dehan nia ba Jornalista INDEPENDENTE, iha nia knar-fatin, Bemori, Tersa (07/10).
Berta hatutan, tanba buka kompaña nia fatin la hetan, KSTL tenke ba hato’o fali protesta iha edifisiu Ministériu Saude (MS).
Aleinde kazu selu tarde, nia dehan, iha tinan 2024 KSTL mós simu keixa husi trabaladór Evip Marel na’in lima iha HoREX Baukau ne’ebé ameasadu lakon servisu.
Ba problema ne’e, nia hatutan, KSTL so bele haruka de’it karta ba parte Aprovizionamentu MS nian, no Ministra Saude, Elia dos Reis Amaral, atu bele orienta kompaña hodi rezolve.
“KSTL ba chek maibé sira emprega fila fali sira na'in lima ne'e, agora daudauk sira servisu la'o ho di'ak. Maibé sira nafatin hasoru problema selu tarde, to'o fulan tolu mak foin simu osan,” dehan Berta.
Problema seluk, nia dehan, trabaladór sira laiha lisensa (cuti), seguransa sosial, no salariu 13.
“Ami keixa to'o ona iha SEFOPE, (haruka karta ba kompaña) mós atu halo karta ba see? tanba kompaña laiha edifisiu, ita atu halo nusa?,” nia afirma.
See mak iha Evip Marel nia kotuk?
Tuir Berta, ho servisu ne’ebé kompaña ne’e hatudu no edifisiu ne’ebé laiha, loloos nia la merese ona atu hetan konfiansa husi MS hodi implementa projetu.
Tan ne’e, nia kestiona tanba sa mak iha tinan 2025 ne’e MS kontinua fó konfiansa ba kompaña Evip Marel.
“Nia manan dala ida ne'e nia para ona. Tanba sa nia manan tan? Se nia manan entaun saida mak iha nia kotuk? KSTL hakarak hatene ida ne'e husi Ministériu Saúde, liu-liu Ministra Saúde. Se kompañia ne'e fatin laiha, nia office mós laiha, loloos labele liu ona,” nia kestiona.
Tuir informasaun ne’ebé KSTL simu, sasan limpeza ne’ebé kompaña fornese mós tama tarde.
Molok ne’e, tuir fonte konfirmadu ida, kompaña rua ne’e nia na’in loloos mak Ministra Saude, Elia A. A. dos Reis Amaral.
“Nia harii kompaña ne’e par atu kaer de’it projetu limpeza iha Ministériu Saude,” dehan fonte ne’ebé lakohi públika ninia identidade ne’e.
Tuir fonte ne’e, iha tinan 2024, Evip Marel, Unipesoal Lda. kaer projetu limpeza iha edifisiu sentral MS nian no HoREX Baukau. Enkuantu iha tinan 2025, Evip Marel II, Lda. kaer projetu limpeza iha edifisiu sentral MS, HoREX Baukau, no Hospital Referal Maubisse.
“Sira tuir duni konkursu mais ne’e formalitas de’it,” dehan fonte ne’e.
Tuir dadus husi Servisu Rejistu no Verifikasaun Emprezarial, Institutu Públiku (SERVE,IP), Evip Marel, Unipesoal Lda. no Evip Marel II, Lda. rejistradu iha SERVE ho tipu atividade Kontrusaun Uma, Estrada, Hatama sasan elektroniku, no atividade limpeza.
“Tuir ita-nia lei sosiedade komersiál númeru 10/2017 no ita-nia Dekretu Lei 16/2017 ne'ebé mak ko'alia kona-ba rejistu komersiál, iha artigu 4, ko'alia klaru hela katak kompañia rua refere hetan ona ninia personalidade juridikamente hodi hala'o nia atividade,” informa Supervizor Senior SERVE,IP, Raul Sanches Lajes, ba Jornalista INDEPENDENTE, Sesta (03/10).
Kompaña Evip Marel, Unipesoal Lda. nia asionista mak Bruno Samuel Efidio Soares, no Evip Marel II, Lda. nafatin Bruno ho nia parseiru José Antonio Pape Gramadeira.
“Tuir ita-nia lei rejistu komersiál, sira na’in rua ne'e mak sai asonista ba kompaña refere,” dehan nia.
Kompañia Evip Marel, Unipesoal Lda. rejistu iha 30 Novembru 2023, no iha 2024 Bruno hamutuk fali ho José loke tan kompaña ida ho naran hanesan maibé ho tipu Lda. ne'ebé mak estabelese iha 27 Novembru 2024.
“Sira-nia atividade prinsipál mak hanesan konstrusaun ba edifisiu ou não edifisiu, konstrusaun ba estrada, konstrusaun ba liña torre sira, no atividade hanesan limpeza jerál i pengadaan ba ekipamentus elektróniku,” nia afirma.
Relasiona ho kestaun ne’e, Jornal INDEPENDENTE koko atu halo konfirmasaun ho Ministra Saude, Elia A. A. dos Reis Amaral, maibé Ministra rekuza hodi fó komentariu.
Enkuantu, husi parte kompaña, maske Jornalista INDEPENDENTE haruka ona mensajen liu husi WhatsApp no telefone, maibé parte kompaña hili atu la koalia.
