Prezidente KI, António Cesar Mali hatete, iha KRO ne'e KI la husu adisionál maibé Primeiru Ministru, Kayrala Xanana Gusmão, nu'udar Prezidente KRO, haree katak média ne'e importante liu atu halo dezeminasaun informasaun ba públiku, no média mós pilár demokrásia ida, nune'e ho inisiativa rasik aloka adisionál ba KI ho montante US$ 200.000.

"Primeiru Ministru hakarak haree adisionál ne'ebé fó mai KI ne'e tenke konsentra liu ba kapasitasaun jornalista sira. Primeiru Ministru hakarak haree katak KI tenke iha planu ida di'ak duni atu hasa'e duni kapasidade jornalista sira-nia para halo kobertura no komunikasaun ida ne'ebé di'ak liután", dehan nia, iha Ministériu Finansas, Sesta (22/8).

Cesar hatutan, Primeiru Ministru konsidera informasaun no notisia ne'e importante, no haree ba área komunikasaun ne'e importante tebe-tebes ba nasaun Timor-Leste, entaun deside atu oferese adisionál ba KI atu bele tau iha atividade sira hodi kapasita no eleva liután kapasidade jornalista sira-nia atu hakerek notisia ne'ebé kualidade aas liután.

Nia hatutan, depois de ida-ne'e KI sei ba halo planu sira kona-ba saida mak KI sei trasa para oinsá atu fo formasaun ba jornalista sira hodi hasa'e liután kapasidade.

"Formasaun ne'e sei ba média hotu-hotu, ne'ebé espera katak osan rihun US$ 200 ne'e ami bele uza ho didi'ak para ezekuta duni ba programa kapasitasaun jornalista sira-nia", tenik Cesar.