"Ita nia projetu ba tinan ida ne'e, ita iha projetu foun 14 ne'ebé nia andamentu to'o agora 30 ou 40 porsentu, nune'e Projetu ne'e ita sei la konklui iha tinan ida ne'e, tanba kondisaun balun ne'ebé la premite atu bele konklui," deklara Diretór Nasionál Infraestutura Edukativa, Ministériu Edukasaun, Hélio Lopes, ba joranlsita sira iha nia kna'ar fatin Vila Verde, sesta (14/11).
Nia esplika, iha fatin balun difisil tebes atu asesu ba estrada no kondisaun estrada ne'e rasik difikulta ba movimentasaun materiál entaun husi problema refere,empreza labale konklui projetu.
Tuir nia, projeitu konstrusaun eskola ensinu báziku filial Postu Lore, Munisípiu Lautém mak tama ona faze finaliza, espera katak iha fulan-dezembru ne'e bele entrega ba Governu hodi utiliza ba prosesu aprendizajem.
“Projetu 14 ne'e implementa iha munisipiu hanesan, Aileu EBF ida, Ainaro iha ida, Baukau EBF Osoluga, Bobonaru EBC ida no EBF ida, Covalima rua, Ermera EBF rua 2, Likisá EBF ida, Lautém EBF ida, Manatutu EBF rua no Manufahi EBF ida.”
"Ba projetu eskola foun 14 ne'e ita, (Ministériu Edukasaun) aloka orsametu ho montante millaun $1.2”, nia tenik.
Alinde ne'e, nia dehan ba tinan-2026, Ministériu planu sei hari tan eskola hamutuk 69, maibé Orasametu sei debate iha parlamentu nasionál, maibe bainhira aprova ona sei hahú implementasaun.
"Ita nia projetu ne'e ba nivel eskolaridade hotu iha territóriu nasionál, " Helio akresenta.
Aleinde ne'e tuir planu iha tinan oin 2026, diresaun nasionál infraestrutura sei kontrui mos rezidensia ba manorin sira.
