Domingu, 16 Maiu 2021 | Login
Bispo Diosesze Dili halo Misa Paskua Kalan,iha Igreja Katedral Dili iha Bispo Diosesze Dili halo Misa Paskua Kalan,iha Igreja Katedral Dili iha

Konfrontu iha Misa Páskua, Madre Monu Ho Óstia Nakfakar Featured

DILI:  Polisia Nasionál Timor Leste (PNTL) no parte seguransa Igreja nian kaer ema na’in haat ne’ebé deskonfia sai autór tuda malu iha selebrasaun misa Sábadu Aleluia iha Igreja Parókia Imaculada Conceição Balide Dili.

Konfrontu tuda malu entre grupu joven Suku Maskarinhas no Lahane Orientál akontese iha oras tuku 11:00 kalan halo sarani rihun hakfodak, tanba joven sira ne’e hemu tua iha li’ur maka tuda malu tama too Jardín Igreja laran hodi halo sarani rihun halai arbiru too soke tan madre Armada ne’ebé fó hela komunga too óstia nakfakar ba rai.

Madre Armada monu ba rai óstia, tanba trauma hare sitasaun joven tuda malu kedas iha ninia oin.

Hafoin akontesimentu, parte grupu kategoriais sira inklui seguransa parókia no polisia konsege hakalma situasaun no lori madre Armanda ho labarik sira ne’ebé trauma no dezmaia ba Igreja laran hodi bele hakalma sira nia kondisaun.

Amu Parókia Igreja Parókia Imaculada Conceição Balide Dili, Graciano da Silva ho hirus lamenta ho atitude joven sira tuda malu iha misa laran too halo madre monu ho óstia.

“Ha’u sente preokupa ho selebrasaun misa boot hanesan ne’e tuir loloos seguransa tenke di’ak,” dehan Padre Graciano iha misa.

Padre husu ba sarani tomak atu buka renova ida-idak ninia moris para bele sai sarani no komunidade ida di’ak hodi moris iha fiar no karidade.

Padre dehan, problema ne’e halo madre sira sente trauma no membru akolitus ida mós hetan tuda iha ninia ain bainhira hamutuk ho padre fó hela komunga ba sarani rihun.

Nia husu atu xefe juventude bairru rua buka halibur joven sira ne’ebé envolve iha problema ne’e atu dame malu hodi labele hamosu tan problema iha futuru.

Padre Graciano dehan, tuir loloos misa Sábadu Aleluia ne’e ema hotu- hotu tenki respeita hodi hametin sira nia fiar no hadook aan husi problema hotu- hotu, tanba Na'i Jesus nia terus too mate atu salva ema hotu hosi sala.

PNTL Detein Suspeitu Na'in Haat

Entretantu,Komandante Interinu (PNTL) Munisípiu Dili Superintendente Asistente Euclides Bele dehan, iha kalan ne’e too domingu horisehik parte polisia no autoridade sira konsege kaptura suspeitu na’in haat ne’ebé deskonfia kria konflitu tuda malu.

Parte PNTL halo kedas investigasaun ba suspeitu sira hodi kontinua rekolla nafatin informasaun karik autór balun envolve tan sei kaer hotu.

“Suspeita na’in haat, maibé na’in ida hodi kalan (sábadu (20/04) ita detein iha eskuadra polisia na’in feto, maibé suspeitu na’in tolu hetan kaer iha ohin dadeer (domingu (21/04),” dehan Euclides.

Nia hatutan, iha misa kalan Sábadu Aleluia PNTL halo seguransa makas iha igreja hotu- hotu iha Dili laran, no Igreja Balidi de’it mak mosu konfrontu tuda malu.

Komandante Euclides rekoñese akontesimentu tuda malu ne’e halo sarani rihun trauma too halai arbiru soke tan madre sira ne’ebé fó hela komunga ba sarani sira.

Nia dehan, Padre ida ne’ebé monu too trauma lori kedas ba ospitál hodi hala’o tratamentu.

Komandu PNTL mós husu ba sarani sira karik balun sai vítima tanba kanek ou hetan tuda tenke hato’o keixa ba polisia hodi prosesa autór sira tuir lei.

Read 1040 times
Rate this item
(0 votes)