Prezidenti BTL,E.P Carlos Peloi hateten, BTL asina kontratu ho Kompañia Lokal Tansos, atu nune'e komesa ona halo kanalizasaun bee moos ba komunidade iha Postu Lolotoe.
"Ohin asina kontratu ida ho ita nia parseiru lokal Kompaña Tansos hodi bele komesa halo servisu kanalizasaun bee moos iha Postu Lolotoe nian liu-liu iha Suku Opa," dehan Prezidenti Iha Salaun BTL Kaikoli, (19/06).
Prezidenti hatete, durasaun ba projetu refere durante fulan neen (6), tanba ne'e, nia husu ba kompañia atu servisu tuir tempu ne'ebé determina ona.
"Projetu ida ne'e sei lori tempu fulan neen (6) nia laran hodi bele remata ita espera katak buat hotu la’o ho di'a,k atu nune'e iha fulan neen nia laran komunidade sira bele asesu ona ba bee iha área refere," tenik nia.
Nia esplika, distansia kanalizasaun nian, entre transmisaun kuaze liu kilometru neen (6) inklui sei monta kontadores ba familia kuaze 161 no populasaun liu rihun ida mak sei asesu ba bee moos refere.
Enkuantu, orsamentu ne'ebé aloka ba projetu refere ho montante dolar amerikanu hamutuk rihun $172.
Iha fatin hanesan, Diretór Kompañia Tansos,Lda, Agustino Vicenti do Santos hatete, sira nia kompaña mak sai vensedor ba projetu kanalizasaun bee moos iha Suku Opa, Postu Lolotoe.
Nia dehan, antes ne'e, sira submete sira nia dokumentu ba iha BTL, no ikus mai sai vensedor ba projetu refere.
Tanba ne’e, sira sei implementa servisu tuir kontratu ne'ebé asina ona.
"Ohin loron ami asina kontratu ida ne'e, liu husi prosesu lubuk ida iha kompetisaun, bainhira submete dokumentus ami mak sai hanesan vencedor, entaun ami hakarak implementa tuir planu ne'ebé Prezidenti BTL informa ona mai ami, ami sei uza kapasidade atu utiliza metodolozia hodi servisu tuir tempu kontratu ne'ebé determina ona," nia esplika.
Na’in ba Kompañia ne’e mós garante katak, kompañia sei esforsu hodi servisu tuir kontratu ne’ebé determina ona.
Entretantu, Xefe Suku Opa, Grasiano Orlando Afonso, agradese ba kompañia Tansos ne'ebé sai vensedor ba implementasaun projetu refere.
Nia dehan, hanesan, autoridade lokal pronto kopera ho kompañia liu husi kulturalmente no sosial.
Enkuantu, Suku Opa iha aldeia tolu mak hanesan, Mape, Tepa no Raimea, ho nia total uma-kain hamutuk 447.
