Enkuantu, iha feira ne’e, negosiante sira faan hahan hanesan, etu, katupa ho modo naan karau, naan manu lalar, inklui sasan nesesidade bázika sira seluk.
Aihan sira ne’ebé negosiante sira faan hahú husi folin dolar amerikanu 0,50 centevus to’o $1,00.
Negosiante Patrisia Erna Oliveira, hatete, komemora loron trajedia Balibo Five ne’e lori sorte boot ba negosiante sira, tanba iha loron babain ema la sosa sira nia sasan no sasan la folin, maibé iha loron importante Balibo five ajuda tebes komunidade hetan rendimentu diak.
Tan ne’e, nia parte orgullu tebes tanba bele hetan oportunidade hodi halo negosiu iha feira refere no hetan rendementu ne’ebé diak.
"Komemora loron Balibo Five, ami Kontente tanba, ajuda tebes hodi hetan rendimentu diak, bainhira hetan rendimentu, bazeia ba hahan ne'ebe fa'an, tanba kada hahan iha kotak ida ho folin dolar amerikanu 0,50 centavus ou no $1,00 dolar, entaun bele hetan to'o dolar amerikanu $75, maibé menus liu hetan mak $50,” dehan nia ba Online INDEPENDENTE, iha ambitu selebrasaun loron Balibo Five, iha Postu Balibo Vila, domingo ne’e (16/10).
Nia hateten, iha komemora loron importante ne'e, negosiante ida-idak lori nia produto hanesan, hahan, no sasan lokal sira, hafoin vizitante sira vizita hodi sosa.
"Iha ne'e, ami faan tuir kbiit ne'ebé mak iha, entaun iha tempu dadersan ami faan fehuk talas, aifarina dose, sasoro, faan kafe, no meudia to'o kalan mak katupa, etu no erwe naan asu, naan manu no karau, entaun durante loron tolu ha'u hetan lukro besik $100 resin,"tenik nia.
Nia hatutan, bainhira feira ne’e atu hahú, komisaun organizadóra fó hatene antes ona atu negosiante sira prepara aihan faan iha feira ne’e.
Iha fatin hanesan, Negosiante Delfina dos Santos hateten, iha loron babain, sasan ne’ebé sira faan la folin, tanba ema ladun sosa sira nia sasan. Maibé durante loron tolu iha feira ne’e sira hetan redementu diak.
Enretantu, Negosiante Maria Fatima Pereira, hateten, kada tinan selebra loron trajedia Balibo Five, sira sempre hetan rendementu ne’ebé diak.
Nia dehan, sasan ne’ebé sira faan sosa tutan husi negosiante sira husi suku mai postu. Sasan sira ne’e mak hanesan, modo tahan, lis, no seluk tan.
“Sasan ne'ebé ami fa'an, tanba ema rame, entaun hetan rendimentu diak, bele hetan dolar amerikanu $20, maibé bainhira ema ladun iha entaun hetan de'it $5,”dehan nia.
