Prezidente Komisaun D ne’ebé trata asuntu Ekonomia no Dezenvolvimentu, Ricardo Baptista hatete, públiku akompaña hela prosesu ajustamentu ne’ebé fó impaktu direita ba atraza pagamentu salariu ba funsionariu sira.

Tuir nia, ajustamentu ne’e atu reorganiza estatutu funsionáriu, inklui estrutura saláriu bazeia ba nivel edukasaun no pozisaun iha ministériu idaidak. Maibé, prosesu ida ne'e rezulta funsionáriu barak seidauk simu sira-nia direitu.

“Direitu ba salariu ne’ebé mak loloos ne’e mensalmente sira simu, maibé to’o agora balun la hetan,” dehan Ricardo iha Parlamentu Nasionál (PN), Kuarta (01/04).

Deputadu ne’e dehan, nia parte seidauk hatene bainhira mak prosesu ajustamentu ne’e remata. Tanba ne’e, nia husu ba governu no KFP atu aselera prosesu ne’e nune’e funsionáriu sira bele simu sira-nia saláriu normál.

“Nu’udar membru Parlamentu ida, nu’udar mós organun ida ne’ebé mak serbisu besik liu ba povu husu ba parte kompetente sira ne’ebé serbisu liga ho Funsaun Públik ho Governu atu aselera prosesu ne’e,” dehan nia.

Responsabilidade governu

Entretantu, membru Komisaun D husi bankada Fretilin, Antoninho Bianco subliña, kestaun ne’e responsabilidade governu no tenke rezolve kedas.

Tuir nia, governu iha obrigasaun atu selu kada traballadór ne'ebé rekruta, tantu liu husi kontratu ka nomeasaun polítika.

Nia subliña katak funsionáriu sira labele sai vítima ba polítika ka kestaun administrativu sira.

“Ha’u hanoin ne’e responsabilidade Governu, governu mak halo kontratu ema sira ne’e,” dehan nia.

Nia mós destaka kestaun sira ho kolesaun dadus funsionáriu nian.

Tuir informasaun, traballadór maizumenus hamutuk 10.000 inklui funsionáriu kontratadu no kazuál ne’ebé seidauk rejista iha baze-dadus ofisiál KFP. Ida-ne'e deskonfia sai hanesan kauza prinsipál ida ba pagamentu saláriu ne'ebé atraza.

Antoninho esplika, rekrutamentu funsionáriu la’ós de’it governu sentrál mak hala’o, maibé mós funsionáriu sira iha nível oioin, hahú husi Diretór Jerál tun to’o iha nível administrativu.

Ho nune’e, mosu diskrepánsia entre númeru funsionáriu sira iha terenu no dadus ofisiál ne’ebé KFP kaer.

Nia hatutan, funsionáriu sira ne’ebé iha kontratu formál iha direitu atu ezije pagamentu saláriu.

Entretantu, ba funsionáriu sira ne’ebé rekruta informalmente ka bazeia ba interese polítiku, responsabilidade tenke fila fali ba parte rekrutadór.