PJR Nelson hato’o kestaun ne’e hafoin partisipa iha komemorasaun loron Proklamasaun Independensia Unilateral ba tinan 50, iha palasiu governu, Sesta (28/11).
"Ha'u lalika repete, imi hatene muito bem, imi rasik hatene liu tiha ha'u. 50 ital, loos ka lae," dehan Nelson.
Seidauk bele fó sai see mak envolve
Bainhira husu kona-ba see de’it mak envolve, Nelson afirma katak nia labele temi naran tanba ligadu ba segredu justisa.
"Ha'u labele hatete kazu ne'e envolve husi see-see, tanba kestaun ida ne'e pesoál ema idaidak ninian, imi hatene muito bem, di'ak liu ha'u, duké imi mai kedok fali ha'u," katak nia.
Mólok ne'e, iha 13 Novembru ne’e MP hato’o karta esklaresimentu ba Universidade da Paz (UNPAZ) kona-ba kazu Ró Haksolok ne’ebé daudaun ne’e iha prosesu investigasaun.
Iha karta ne’e, MP hatete, kazu ne’e hahú husi relatóiru Cámara de Contas nian kona-ba jestaun administrativa no finanseira RAEOA no ZEESM iha tinan 2014 no 2016.
Ho nune’e, kazu ne’e rejista iha 2020 no Komisaun Anti Korupsaun mak halo prosesu investigasaun kona-ba responsabilidade finanseira. Maibé prosesu ne’e suspende tiha durante durante tinan rua tanba Covid-19 no laiha Komisariu KAK.
Iha Maiu 2025, MP deside atu kontinu kazu ne’e ho direitamente ba prosesu investigasaun.
Na’in 58 sai sasin
Iha prosesu investigasaun ne’ebé MP halo identifika katak kazu ne’e envolve ema na’in 58 ne’ebé sasin ba krime haat mak hanesan:
- Abuzu poder
- Partisipasaun ekonomia no negosiu
- Administrasaun danoza
- Fraude Fiskal.
Tuir MP prosesu investigasaun ba kazu ne’e presiza kooperasaun judisial intenasionál atu aselera prosesu ne’e.
Inkeritu independente 10
Liga ba proseu ne’e, iha inkeritu idependente 10 no MP promete bainhira kada inkeritu hotu sei fó sai ba públiku.
Iha inkeritu ne’e balun kona-ba prosesu responsabilidade finanseira konklui iha 2023, MP husu responsabilidade ba ema na’in 14, inklui Prezidente Autoridade RAEOA –ZEESM no Sekretariu Rejional sira ho kondenasaun selu osan $421.000, tanba halo kontrata illegal ba kompaña no laiha reseita ba estadu.
Maibe iha Dezembru 2024, juis ne’ebé kaer prosesu ne’e deside atu halakon kazu ne’e. MP hato’o rekursu ba Tribunál Rekursu maibe to’o ohin tribunál seidauk fó resposta.
