Ajensia ne’e lamenta prosesu ba kazu ne’e seidauk produz rezultadu ne’ebé klaru no sei arrasta hela iha Tribunál Rekursu (TR).

Diretór Ajénsia Travel Narpov Air, José Alexandre Guterres kazu ne’e relasiona ho konflitu entre ajénsia Narpov Air no airlines Fly Timor, liu-liu kona-ba diferénsia presu tikete aviaun no tranzasaun finansia ne’ebé envolve osan ho montante boot.

“Iha tinan 2021 empreza balun hasai presu tikete aviaun. Ami hanesan ajensia charter aviaun ho airlines Fly Timor, ha'u ho inisiativa kontatu Diretór  ajensia Fly Timor, Pedro Carrascalão, ami deskute oinsa atu normaliza presu tikete aviaun. Iha momemtu ne’ebá ita konsege duni iha konkordansia,” dehan nia jornalista Jornal INDEPENDENTE, iha Hudi Laran, Kuarta (13/05).

Ho konkordansia ne’e, Ajensia Narpov Air, nia hatutan, transfere osan tikete aviaun ne’ebé pasajeiru sira sosa ho montante $52.500 ba konta bankaria privadu Pedro Carrascalão.

Maibé ikus mai Fly Timor uza senariu ida hodi hapara vou aviaun nian. Nune’e Narpov Air lakon osan no sofre prezuizu, inklui devolusaun parsial ba pasajeiru sira.

“Momentu ne'ebá ita lakon buat barak, inklui pasajeiru sira mós lakon sira-nia sasan, entaun ami husi ajensia Narpov Air konsege rezolve hodi devolve hikas pasajeiru sira-nia osan, la 100 porsentu, maibé ami konsege transfere orsamentu rihun $150 ba pasajeiru idaidak nia konta bankaria,” nia konta.

Keixa ba Ministériu Públiku

Tanba problema refere, Narpov Air hato’o keixa ba Ministériu Públiku (MP) hasoru Fly Timor.

Iha faze ne’e, ajénsia mós kontrata advogadu privadu husi SGF Legal Business Consultant ho kontratu valor $13.000.

Tuir akordu, Narpov Air selu 75%, ho montante $7.500, hodi garante akompañamentu legal iha tribunál.

Maibé ikus mai, José dehan, nu’udar kliente la hetan informasaun klaru kona-ba andamentu kazu.

“Maibé ikus mai, ami rona informasaun husi ema seluk katak kazu ne’e rasik prokurador titular husi Ministériu Publiku halo arkivamentu, maibé parte advogadu laiha informasaun ba ami,” katak nia.

Ho informasaun ne’e, Narpov Air komunika kedan ho advogadu hodi follow up prosesu ne'e. Maibé parte advogadu haruka Diretór Narpov atu hein de’it,

Tan ne'e, nia parte konsidera aktu advogadu ne’e la di’ak no husu parte relevante atu tau atensaun ba pessoal sira hanesan ne'e, se lae bele sai hanesan grupu organizadu atu bosok ema seluk.

“Ami ezije ba parte relevante atu toma atensaun ba pessoal ho naran Doutor Miguel Faria, ba atetude ne'ebe nia komete to'o agora laiha informasaun ba ami. Tanba  ami sente lakon buat barak no kazu ne'e seriu tebes ba ami hanesan emprezariu,” katak nia.

Tuir nia, bainhira prokurador titular akriva kazu ne’e, advogadu tenke buka hatene, tanba saida mak arkiva.

“Iha semana kotuk, advogadu Miguel Faria haruka mensajen ida ba ha’u katak, kazu ne’e nia dirije fali ba advogadu seluk mak halo akompañamentu,” katak nia.

Resposta husi parte advogadu

Iha sorin seluk, advogadu Miguel Faria husi SGF Legal Business Consultant deklara katak nia halo ona auto-partisipasaun ba Ministériu Públiku bazeia ba keixa husi Narpov Air.

“Momentu ne’eba MP arkiva prosesu ne'e laiha notifikasaun ba ha'u. Se MP notifika ha’u karik, ha’u bele hato’o fali pedidu atu retira prosesu ne'e hodi halo analiza no buka rezultadu investigasaun tanba saida mak arkuvu. Maibe to'o agora MP seidauk fó prosesu ne'e mai reprezentante husi advogadu vitima atu haree prosesu ida ne'e,” nia dehan.

Nia parte, Miguel dehan, hato’o pedidu ba MP atu husu rezultadu investigasaun hodi halo analiza fila fali no junta tan ho provas balun ne’ebe vitima oferese. Maibé, MP la hasai despaixu ida par hetan autos kona-ba investigasaun ba advogadu.

“Agora kestaun ne'e mak to'o iha Ministériu Publiku halo investigasaun no rezultadu investigasaun halo arkivamentu sem notifikasaun ba advogadu atu hatene prosesu ne'e tanba saida mak arkivu,” Faria dehan

Kona-ba pagamentu, nia esplika, normalmente bainhira advogadu halo ona auto-partisiapaun ba MP, vitima tenke selu, tanba ida ne’e advogadu privadu.

Dadaun nia dehan, konsultan SGF kontinua hato’o pedidu ba MP hodi foti autos.

Maibé, tanba nia asumi tiha kargu nudar Adjuntu Komisariu KAK, nune’e kazu refere nia parte delega fali ba SGF konsultan advogadu, Gilberto, hodi akompaña.

“Laos advogadu mak ignora prosesu ne'e, lae. Advogadu nafatin halo akompañamentu ba prosesu ida ne'e, no sei halo konfirmasaun ho MP katak despaixu ba rezultadu investigasaun sai ona ka seidauk,” katak nia.

Atual Komisariu Adjuntu KAK ne’e deklara, prosesu ne'e konsulta SGF sei la husik tanba advogadu seluk kontinua servisu nafatin hodi hein despaixu husi MP.

“Se MP hasai despaixu, fó autos ne'e mai ona, ita halo analiza investigasaun ho provas ne'ebé Narpov air fó mai ita junta hodi hatama fila fali. Tan ne’e advogadu Gilberto kontinua halo konfirmasaun prosesu ne'e ba MP,” nia afirma.

Miguel hatete, Konsultan SGF kontinua halo komunikasaun ho parte kliente Narpov air hodi follow up ba malu kona-ba prosesu ne’e. tanba se kliente fó konfiansa, advogadu nafatin halo servisu.

Iha sorin seluk, Advogadu Privadu Gilberto do Rego informa, Miguel delega kazu refere ba nia, laos atu troka maibé oinsa atu halo akompañamentu de'it.

"Ha'u ajuda halo akompañamentu de'it, bainhira ha'u hetan informasaun ruma, ha'u pasa fali ba advogadu Miguel Faria," nia esplika

Dadaun nia dehan, prosesu ne'e nia andamentu lao hela iha MP. Tanba ne’e  kompeténsia hotu-hotu iha MP nia liman.

"Tanba keixa hotu-hotu advogadu Miguel Faria hatama ona, ita hein halo konfirmasaun de'it," katak nia

Nune’e, nia husu ba Diretór Narpov Air atu pasiénsia hodi hein, tanba buat ne’e bazeia ba desizaun MP nian.