Diretór Servisu Apoiu Diagnóstiku Terapeútiku, Hospoitál Nasionál Guido Valadares (HNGV), Vidal de Jesus Lopes hatete, daudauk ne’e total pasiente na’in 111 mak sei hala’o hela tratamentu, na’in 54 iha HNGV no na’in 56 iha fiel ospital Tasi Tolu.

Pasiente na’in 14 ne’ebé mate, nia dehan, tanba tama ona ho kondisaun grave.

“Balun todan tiha ona mak lori mai, ita la konsege salva i laós puramente dengue mak halo, akompaña tan ho moras sira seluk tan, signifika tama ona iha faze ida komplexu mak lori mai, tenta halo tuir hotu ona prosedimentu tratamentu maibé la konsege salva, maioria idade menus husi 15 anos,” dehan Vidal iha HNGV, Segunda (23/02).

Nia afirma, kazu lakon vida ne’e laos tanba aimoruk laiha maibé tanba lori tarde ba fasilidade saúde hodi hetan atendementu.

“Normalmente kazu dengue ne’e laiha aimoruk espesifiku maibé so bele halo de'it kuidadu intensivu hodi jere nia soke inklui halo tratamentu primaria liu husi terapia apoiu nian hodi hamenus sintoma sira,” katak nia.

Kona-ba espasu iha HNGV seidauk iha mudansa signifikativu tanba ne’e kontínua utilija ospitál Tasi Tolu hodi sai alternativa tanba to’o ohin loron pasiente dengue kontínua aumenta.

Nia dehan, Ospitál nia papél mak halo tratamentu no jestaun ba kazu sira, entermus prevensaun no promosaun edukasaun ne'e papel husi Ministériu Saúde.

Entretantu, iha 03 to’o 09 Fevereiru, ema na’in 152 tama Hospital Nasionál Guido Valadares tanba sofre moras dengue. Númeru ne’e hanesan mós ho medida pasiente na’in 25 kada loron, ne’ebé indika iha aumentu kazu dengue.

Tuir dadus, husi 01 Janeiru to’o 02 Fevereiru 2026, HNGV rejista kazu dengue 383, no to’o iha 09 Fevereiru, horseik, kazu dengue ne’ebé rejista sa’e ba 535. Signifika, iha loron neen nia laran, iha aumentu kazu 152.

"Kazu dengue nian ne'e hahú husi dia 01 de Janeiru até dia 02 Fevereiru 2026, ne'e totál hamutuk 383 kazus,” informa Diretór Servisu Apoiu Diagnóstiku no Terapeutiku, HNVG, Vidal de Jesus Lopes, Segunda (02/09).

Enkuantu, tuir dadus atual ne’ebé Diretór Vidal fó sai iha 09 Fevereiru, , total númeru kazu dengue sa’e ona ba 535.

"Dadus dengue hahú husi 01 Janeiru to'o 09 ohin (horseik), dadus dengue ne'ebé mak rejistradu ka baixa no balun ne'ebé mak fila uma ona hamutuk 535,” dehan nia.

Husi númeru kazu ne’e, Vida hatete, na’in hitu mak lakon vida, na’in 111 mak kontinua halo tratamentu iha HNGV, no na’in 417 mak alta ona.

“Ida agora daudaun atuál baixa ne'e hamutuk 111 no seluk ne'e alta hotu ona, husi 535 totál mate ne'e na'in hitu,” dehan nia iha nia knar-fatin.

Husi na’in 111 ne’ebé baixa, nia dehan, na’in 78 baixa iha HNGV no na’in 43 transfere on aba fiel ospitál Tasi Tolu.

“Sira ne'ebé mak baixa ne'e ho kondisaun balun garve, balun tama ona shock, balun tama ona handmorazia tuun. Sira garve ne'e hotu-hotu baixa iha HNVG no ida kategoria kaman mak ba hotu iha fiel ospitál Tasi Tolu,” dehan nia.

Enkuantu, husi pasiente hirak ne’ebé rejistu, na’in 18 mak ema boot ka adultu, enkuantu maioria labarik ho idade husi tinan 14 ba kraik.

"Husi dadus sira ne'e pasiente barak liu mai husi Munisípiu Dili mak rejistu aas liu, tuir fali mak Ermera no Likisá,” dehan nia.