Nune’e, labele komete problema ka krime iha sosiedade nia leet.

“Ita haree reativa artemarsiál  mosu uniforme oioin, membru sira hahú partisipa iha atividade sira hanesan igreja no nasaun nian,  dala ruma ba iha parókia ruma iha kór oioin, no asembleia igreja nian, ida-ne’e  halo ita hetan forsa,” dehan Kardeál liu husi ómilia iha misa agradesementu, iha Tasi-Tolu, tersa ne’e (06/09).

Sua Eminênsia Kardeál haktuir, ezemplu ida ne’ebé iha fulan hirak liu ba, iha atividade igreja nian iha munisípiu balun membru husi grupu artemarsiál ho kór oioin hamutuk lori krúz ba iha foho leten mezmu todan maibé membru artemarsiál hamutuk hodi unifika forsa hamutuk hodi serbisu hamutuk.

Ho nune'e, ho asaun ne’ebé sira halo, ida ne’e hola parte mós iha promove kultura.

“Iha oportunidade ne’e, husu ba líder artemarsiál iha nível nasionál tun to’o baze, hakarak atu propoin hadi’ak ita nia foinsa’e hatene kaer liman servisu hamutuk, espíritu diálogu, hadomi malu hodi kontinua nafatin,” nia apela.

Kardeál ne’e, akresenta, maski kór la hanesan, maibé tuir dokumentu  fraternidade umana ne’ebé hasai deklarasaun husi Amu Papa no líder relijaun izlámika ne’ebé Parlamentu Nasionál Timor-Leste mós adopta ona rezolusaun ne’e.

“Ida ne’e parte ida book ita hotu nia fuan no laran, liu liu foinsa’e iha papél atu eduka no orienta valór vertude kultura domin no dame,” Dom Virgílio dehan.

Nia sublina, Maromak nia liafuan  kontinua hanorin, buka maneira foun oinsá promove dame no domin, dala ruma haree sosiedade nia leet buras ho  problema.

Tanba ne’e, presiza promove nafatin kultura, iha nível nasionál to’o ba suku, aldeia no mós ba sosiedade.