Nune’e, lista ba naran kadetes hirak ne’e, komisaun rekrutamentu haruka ba munisipiu ida-idak, inklui RAEOA, iha loron 6 fulan-Setembru 2022.
Atu nune’e taka sai lista ne’e, iha sira nia suku, aldeia no postu.
Tuir Koordenadór Jerál II Tenente Koronel Mario Baptista, “Bersama”, hatete, nia parte hakarak atu fó sai ba aplikantes no públiku tomak kona-ba testes kandidatu foun ba F-FDTL, ne'ebé hala'o ba aplikantes iha sentru instituisaun hahú iha loron 25 fulan-Jullu to'o 27 fulan-Agustu tinan 2022.
Tanba ne’e, komisaun rekrutamentu halo ona verifikasaun no rezultadu testes hotu sei hala'o iha Metinaro.
"Ohin (06/09), komisaun rekrutamentu desloka ona ba munisípiu 13 inklui RAEOA atu taka sai naran ema na’in 600 ne'ebé sei tuir teste iha Metinaro, iha loron 20 fulan ne’e,”dehan nia iha konferensia imprensa, iha Kuartel Jeneral Fatuhada Dili, segunda horseik (05/09).
Nia hatutan, molok ne’e, komisaun hato’o ona lista ba Ministru Defeza no mós Xefe Estadu FALINTIL-Forsa Defeza Timor-Leste, Tenente Jeneral Falur Rate La’ek no dokumentus hirak ne’e hetan ona aprovasaun final.
"Tanba ida ne'e mak ami mós hakarak, informa katak entre aplikantes 600 ne'ebé iha, komisaun rekrtutamentu mós fó prioridade ba liu feto entermus igualdade jéneru,"dehan Koronel.
Entretantu, bazeia ba teste kadetes foun faze daruak iha tinan ida ne’e, hetan feto hamutuk pursentu 10,5 (10,5%), ne’ebé koresponde ba na’in 65 no mane hamutuk 89% koresponde ba 535.
Tanba ne'e, Koronel Marito husu, ba aplikante sira atu haree sira nia naran no mós adisionais ba relativamente ba enkorporasaun ne'ebé sei halo iha ida-idak nia munisípiu, postu administrativu no mós iha Sede PNTL ninia, iha munisípiu sira hotu.
Enkuantu, iha loron 19-20 setembru 2022, kandidatu sira mai aprezenta aan iha Kuartel no bainhira liu ona, loron rua ne'e mak sei konsidera eliminadu.
Nia dehan, liu husi rekrutamentu ne'e la'ós rezime espesial maibé meritu, tanba ne'e fó oportunidade ba Timoroan hotu.
Iha fatin hanesan Kordenadora Jerál I, Dilia de Souza hatete, husi komisaun rekrutamentu atu hato'o informasaun importante ba kandidatu ne'ebé atu enkorkora iha sentru instrusaun komandante Nikolau Lobato iha Metinaro mak hanesan tuir mai ne'e,
(1). Kada aplikante ida sei aprezenta nia aan iha Kuarter Jeneral F-FDTL, Fatuhada, Dili, iha loron 19 fulan-Setembru tinan 2022, hodi halo komfirmasaun, hafoin transporta ba Metinaro iha loron 20 fulan-Setembru 2022, iha tuku 07:20 otl.
(2). Kandidatu ida tenke loke kedas konta bankaria ida-idak tuir banku ne'ebé mak sira hakarak.
(3). Kada kandidatu tenke lori kopoia koloridu konta bankaria ida kartaun eleitoral, ho foto kolorida medida 3×4 iha loron ne'ebé aprezenta aan iha Kuartel Jeneral.
(4). Kada kandidatu tenke lori roupa jinastiku sapatias no meias mutin pars rua, kalsa metan no kamizola mutin
(5). Kada kanditatu autoriza lori de'it kalsa naruk no kamizola gola par rua.
(6). Lori mós lamina hodi koi hasan rahun pak ida.
(7). Kandidatu ida sei lori eskova no grasia sapatu kor matan no lori relojiu liman ida.
(8). Kandidatu ida mai aprezentaan tenke tesi fuk badak, mane nian sentimetru ida, ba feto sentimetru 10.
"Husi informasaun sira ne'e mak ami hato'o, husu ba sira nia antensaun atu kontinua sira nia sakrifisiu ba heroi FALINTIL sira nia luta durante iha partisipasaun".
