Vise Ministra Asuntu ASEAN, Milena Rangel hatete, diplomata Timor-ona sira iha kondisaun ne’ebé di’ak no kontinua halo komunikasaun intensivu ho governu Timor-Leste.
“Ita-nia Diplomata iha Myanmar di’ak.Ita iha kontaktu ho sira di’ak tebtebes.Ita hetan 7 dias par prepara atu sira bele fila-fali mai Timor-Leste.Mais ita-nia Diplomata mak fila maibé relasaun entre povu ho povu Myanmar ita kontinua mantein,” dehan Milena hafoin audensia ho Komisaun B Parlamentu Nasionál, Kinta (19/02).
Tuir nia, kona-ba problema prinsipal ne’ebé kauza desizaun husi Myanmar ne’e sei koalia liu husi dialogu entre nasaun.
“Iha buat balun ke presiza entre estadu rua ko’alia ba malu, maibé ita iha prosesu halo hela serbisu sira ne’e,” dehan nia.
Desizaun husi junta Militar ne’e, Milena dehan, sei la afeita ba Timor-Leste ninia envolvementu nu’udar membru plenu ASEAN.
“Ita membru ona, membru plenus direitu ita goza, previleziu hanesan estadu membru ida hanesan sira seluk.Buat hotu-hotu di’ak hela, negosiasaun lao nafatin, serbisu sira mós lao nafatin, laiha impaktu ne’ebé ke atu muda fali ita-nia estatutu, lae, ita kontinua membru ASEAN,” katak nia.
Iha fatin hanesan, Prezidente Komisaun B, Domingos Augusto ‘Deker’ hatete, nia parte seidauk apar ho situasaun ne’ebé Diplomata sira hasoru nune’e sei komunika ho MNEK no Diplomata Timor-oan iha ne’ebá.
Editor: Jorgino dos Santos
