Nia dehan, Jornalista nia misaun mak buka no habelar lia-loos, promove justisa liu husi informasaun, ne'ebé fundamentál ba konsolidasaun demokrasia Timor-Leste nian.
“Ba jornalista timoroan sira, hakarak dirije liafuan espesiál ida kona-ba rekoñesimentu no responsabilidade Jornalista sira maka erdeiru sira ba legadu husi Balibo Five no Roger East. Ita-boot sira nia misaun atu buka no habelar lia-loos, atu promove justisa liu husi informasaun, ne'e fundamentál ba konsolidasaun ita-nia demokrasia,”dehan nia iha ambitu reflesaun nasionál ba selebrasaun loron Trajedia Balibo five ba dala-50 no Liberdade Imprensa ba dala tolu, ne’ebé hala’o iha Kampo Balibo, Kuarta (15/10).
Xefe Estadu-Maiór Jenerál F-FDTL hatutan, Jornalista sira labele para hodi buka lia-loos, kompromete iha ida-idak nia defeza ba justisa, no inkoruptivel iha kompromisu ba informasaun ne'ebé loos. Istória Timor-Leste nian sei hakerek hela, no Jornalista sira iha priviléjiu no responsabilidade atu rezista ba jerasaun sira iha futuru.
“Dezafiu sira ne'ebé ita-boot sira hasoru ohin loron diferente ho sira ne'ebé maka Balibo Lima hasoru, maibé la menus importante. Iha mundu ida ho dezinformasaun no manipulasaun mídia, ita-boot sira nia kompromisu ba lia-loos faktuál maka nesesáriu tebes,”katak Falur.
Nia dehan, ba jornalista sira Keta tauk ho podér, keta reduz ho solusaun fásil sira, keta rende ba tentasaun sensasionalizmu sira. oñra sakrifisiu husi sira ne'ebé maka fó sira nia moris ba lia-loos hodi sai defensór sira ne'ebé kompromete ba lia-loos.
Nia afirma, Balibo five no Roger East la'ós Timor-oan, maibé sira-nia raan ne'ebé fakar iha Timor-Leste halo sira sai parte ba TL nia istória ne'ebé TL partilla. Sira nia sakrifisiu ba lia-loos maka parte ida husi narativa TL independénsia nian.
“Ohin, bainhira ita komemora aniversáriu ba dala 50 husi eventu trájiku ida-ne'e no selebra Loron Nasionál Liberdade Imprensa nian, ita hafoun ita-nia kompromisu ba valór sira ne'ebé sira fó sira nia moris ba: liberdade, lia-loos, no justisa,” Nia Salienta.
Tanba FALINTIL-FDTL, nu'udar instituisaun ne'ebé moris husi rezisténsia no iha servisu ba demokrasia timoroan nian, fó onra ba memória ema aten-barani sira-ne'e nian no reafirma kompromisu atu defende liberdade imprensa nu'udar valór fundamentál ba nasaun TL nia independente.
Nune’e, jornalista internasionál sira-nia ezemplu inspira povu hodi harii Timor-Leste ida neʼebé iha lia-loos, manán lia-bosok, justisa manán impunidade, no liberdade manán opresaun.
