“Nu’udar Xefe Estadu Maiór FALINTIL-FDTL, ha’u hakarak afirma ho solene komprimisiu ita nia Forsa Armada nian hodi defende liberdade imprensa iha Timor-Leste. Komprimisiu ida ne’e la’ós de’it instituisonál maibé ida ne’e istóriku,” dehan Xefe Estadu Maiór F-FDTL Falur Rate Laek, iha ambitu reflesaun nasionál ba Komemorasaun loron trajedia Balibo Five ba dala-50 no loron liberdade Imprensa ba dala-tolu, ne’ebé hala’o iha kampu Balibo, Kuarta (15/10/25).
Falur afirma. FALINTIL-FDTL, mak herdeiru husi rezisténsia armada hasoru okupasaun, rekoñese katak nia misaun atuál atu defende soberania nasionál inklui mós defende valór demokrátiku sira ne'ebé Timor-Leste luta ba iha tinan barak nia laran.
Tanba ne’e, Xefe Estadu-Maiór F-FDTL dehan, Liberdade imprensa la'ós ameasa ida ba seguransa nasionál maibé Imprensa ida ne'ebé livre, responsavel, no profisionál maka aliadu di'ak liu ba Forsa Armada profisionál sira ne'ebé komprometidu ho valór demokrátiku sira.
“Tanba ne'e, ha'u garante ba profisionál mídia sira neʼebé prezente iha ne'e katak FALINTIL-FDTL sei defende nafatin imi-nia liberdade informasaun no imi-nia direitu atu kestiona. Eskrutiniu públiku ba ita-nia instituisaun sira, inklui militár, hametin ita-nia demokrasia no kontribui ba hadi'a ita-nia servisu ba nasaun,”tenik nia.
Iha fatin hanesan Provedór Direitus Umanus no Justisa Virgílio Guterres “Lamukan” mós husu ba jornalista sira atu hakerek kona ba komprimisiu FALINTIL-Forsa Defeza Timor-Leste ne’ebé nu’udar entidade Estadu ida ne’ebé iha komprimisiu atu defende liberdade imprensa no garante liberdade ba jornalista sira hodi kestiona poder públiku sira nian.
“Ida ne’e hakerek nafatin,atu ba oin sai hanesan referensia atu husu, tanba agora Tenente Jenerál Maun Falur ko’alia ida ne’e, laiha garantia katak Tenente Jenerál seluk aban bairua tuir mai iha komprimisiu hanesan, ita hein katak komprimisiu ida ne’e sai nafatin komprimisiu ba oin,” dehan Provedór PDHJ.
